E evento a trece hunto e lidernan, stakeholdernan y expertonan den e industria di turismo pa discuti entre otro riba e futuro di turismo na Aruba.

Minister di Turismo, Transporte y Labor mr. Wendrick Cicilia a tene un discurso resaltando e importancia di hende y sostenibilidad loke ta impulsa e transformacion turistico di Aruba.

Minister Cicilia a expresa “No ta midi turismo solamente den yegada di bishitante of ocupacion di hotel, e ta un realidad door di hende.” Nos bartendernan, personal di housekeeping, chefnan, taxistanan, tour guide y otronan ta transforma tareanan comun den experiencianan extraordinario. Nan ta e heroenan anonimo di nos industria. Transformacion sostenibel mester cuminsa door di balora nos heroenan.”

E agenda di turismo sostenibel di Aruba ta basa riba tres pilar fundamental:

• Supervision ambiental; salvaguardia e beachnan, rifnan y recursonan natural di Aruba.
• Inclusion social; garantisa oportunidad husto y condicionnan digno pa tur trahado den e sector turistico.
• Resiliencia economico; enfoca riba turismo impulsa pa balor door di atrae e bishitantenan di calidad y fomenta innovacion.

Sostenibilidad no ta encera solamente responsabilidad ambiental, pero tambe  proteccion di e medionan di subsistencia. Ademas garantisa cu ta comparti e beneficionan di turismo den henter comunidad.

Organisa pa Aruba Tourism Authority, e conferencia a conta cu presentacionnan principal, discusion di panel y sesion di networking. ATA ta reafirma e compromiso di Aruba pa un acercamento colectivo den construi un futuro sostenibel pa turismo.