Rektifikashon riba deklarashonnan tokante Aqualectra

Willemstad – Ministerio di Tráfiko, Transporte i Planifikashon Urbano (VVRP) ta reakshoná riba e notisia di 19 di sèptèmber último relashoná ku Aqualectra.

Durante un entrevista, un funshonario di e ministerio a hasi deklarashonnan ku a duna e impreshon ku empleadonan di Aqualectra, kontra akuerdonan ku e ministerio, ta konektá awa i koriente na aktividatnan di konstrukshon ilegal. Ministerio di VVRP ta lamentá ku e deklarashonnan aki a krea un impreshon robes i ta enfatisá ku esaki no ta den liña ku e posishon di e ministerio.

E problemátika di konekshon di awa i koriente na konstrukshonnan ilegal ta, den e konteksto di e esfuersonan pa bringa ilegalidat, un punto di preokupashon grandi pa e ministerio. Pa e motibu aki, e ministerio ta den komunikashon ku Aqualectra na nivel tantu operashonal komo táktiko. E kombersashonnan aki ainda no a yega na akuerdonan formal, pero ta sigui den un bon kolaborashon.

Ministerio di VVRP ta rekonsé i ta respetá e ròl importante di Aqualectra komo kompania di utilidat i e esfuerso di su empleadonan pa proveé komunidat di Kòrsou di awa i koriente. E ministerio, pa e motibunan aki, ta lamentá e konfushon ku a surgí i kualke daño kousá pa e deklarashonnan aki.

Ministerio di VVRP ta keda komprometé na un kolaborashon transparante i konstruktivo ku Aqualectra i tur otro partidonan, ku e meta komún di un desaroyo di Kòrsou ku ta seif, legal i sostenibel.