Minister di Salubridat Públiko, Medio Ambiente i Naturalesa a informá gerensia i personal di Curaçao Zoo Foundation den su totalidat ku dia 4 di novèmber 2025, e akuerdo di maneho di e organisashon akí lo terminá konforme lei i ku lo no renová esaki.

Diabierne Minister di Salubridat Públiko, Medio Ambiente i Naturalesa a informá gerensia i personal  di Curaçao Zoo Foundation den su totalidat ku dia 4 di novèmber 2025, e akuerdo di maneho di e  organisashon akí lo terminá konforme lei i ku lo no renová esaki. 

Despues di un evaluashon amplio, entre otro a base di algun rapòrt di inspekshon, a determiná ku  tabatin defisiensia den e maneho di e último sinku añanan, manera falta di mantenshon, e echo ku e  parke di bestia no tabata habrí tur ora manera mester ta, i ku tabatin negligensia den kuadro di  bienestar di bestia na mas ku un okashon. 

Pa garantisá e balor di nos parke di bestia pa komunidat, gobièrnu ta opta pa tuma un rumbo nobo  den maneho i eksplotashon di e parke.  

‘Parke di bestia ta un sitio úniko pa nos komunidat, un sitio kaminda mucha, famia i skol por bai pa  siña i disfrutá di e bestianan i naturalesa. Minister Silvania ta enfatisa ku e parke ta keda habri pa  publiko i lo hasi tur ku ta posibel pa garantisá bienestar di e bestianan. 

Algu ku tin masha prioridat pa Minister ta mantenshon di empleo. Ministerio ta studiando di ki  manera por logra pa personal di Curaçao Zoo keda ku nan trabou. 

Den e próksimo lunanan, Ministerio di Salubridat Públiko, Medio Ambiente i Naturalesa lo traha  huntu ku e partidonan konserní riba un solushon duradero i ku por enfrentá e retonan di futuro. 

Minister ke enfatisá ku e meta ta pa, den e próksimo añanan, Curaçao Zoo krese i bira un parke di  bestia moderno i edukativo, kaminda e bishitantenan lo bai no solamente pa atmirá e bestianan, sino  tambe pa siña tokante kuido di naturalesa, biodiversidat i sostenibilidat. Asina, e parke lo sigui sirbi  komo un inspirashon pa grandi i chikí, i sigui kontribuí na un Kòrsou mas bèrdè i mas konsiente.