Bándabou ta kla prepará pa selebrá su dia riba 5 di òktober 2025

KÒRSOU – Djadumingu 5 di òktober 2025 lo selebrá Dia di Bándabou, ku ta konta ku un programa amplio i variá, pa henter pueblo di Kòrsou.

Selebrashon lo kuminsá for di 10:00 di mainta ku un santu saktifisio di misa na Parokia di San Hose (Barber). Despues bishitantenan lo tin oportunidat pa eksplorá stèntnan di artesania, asesorio, kos dushi, kuminda i otro produktonan, ku ta mustra diversidat di kreatividat lokal.

Pa 2 or di merdia lo tuma lugá e kompetensia di brassband, kaminda gruponan lo kompetí pa tituló maximo. pa 5 or di atardi, huntu ku Ministerio di Enseñansa, Sènsia, Kultura i Deporte lo bai tin seremonia di klousura di Siman di Kultura 2025. Pa 7:30 di anochi, Task Force Karnaval Bándabou lo apertura di Karnaval di Bándabou 2026, ku lo bai kulminá den un show di apertura, ku presentashon di One Flavaz i nos Reina di tumba 2025.

Durante dia lo tin presentashon musikal di diferente grupo i artista lo bai tin: Kaha di òrgel, músika típiko, Grupo di Baile, Grupo Ruta, Grupo Brasa Brasa, Los Originales, Orirí, One Flavaz i Icons.

Den kuadro di selebrashon, organisashon ta informá ku Kaminda Prospero Rojer lo será for di 8:00 di mainta te 12:00 di anochi, for di altura di Misa di Barber te Ser’i mulina, i ta aksesibel solamente na pia durante e evenemeto.
Outomobilistanan lo mester hasi uso di ruta alternativo, pa yega nan destinashon.
Tambe ta hasi apelashon na tur bishitantenan pa kore i parkeer na manera sigur i responsabel. Nos ta konta ku bon komportashon di komunidat pa garantisá un evento eksito.

Pueblo di Kòrsou ta keda kordialmente invitá, pa bin sostené i selebrá huntu ku nos for di 10 or di mainta te 12 or di anochi na bandabou (Kaminda Prospero Rojer na Barber), kaminda kultura i tradishon ta brota.