Konseho di Minister a risibí bishita di Konseho di Konsulta

WILLEMSTAD – Riba djárason, 8 di òktober 2025, Konseho di Minister a risibí un bishita di Konseho di Konsulta, mihó konosí komo Raad van Advies (RvA). Durante e bishita sra. Lizanne Dindial, vise presidente di Konseho di Konsulta, a hasi un introdukshon kòrtiku tokante e ròl i tareanan di Konseho di Konsulta den trayektonan di lei pa pais.

Konseho di Konsulta ta konsistí di un máksimo di 9 miembro, kada un ekspertonan den nan área i ku di forma imparsial i ophetivo ta aportá na pais. Sra. Dindial a splika e ròl ophetivo i di duna konseho (“adviserend”) ku e órgano tin. Pues semper bai ta na Gobièrnu pa disidí kiko pa hasi ku e konsehonan.

Durante e kòmbersashon ameno a para ketu tambe riba e ròl importante di WJZ ku ta e Direktorado di Lei i Asuntunan Hurídiko na Ministerio di Asuntunan General, den tur trayektonan di lei. Aktualmente WJZ tin nesesidat di asina yamá “wetgevingsjuristen” i ta importante pa por ekipá e organisashon pa por yuda nos prosesonan di lei kana mas optimal. Konseho di Minister na su turno a splika ku Gobièrnu su partisipashon na FRED Expo na Hulanda dia 18 di òktober próksimo ta entre otro pa por buska huristanan.

Por último Konseho di Konsulta a hasi un apelashon na Konseho di Minister pa den planifikashon di aña, purba tene kuenta for di adelantá ku prosesonan di lei i posibel trayektonan ku durante aña lo tin ku bai Konseho di Konsulta pa konseho. Último añanan por a mira un porsentahe relativamente haltu di kasonan ku a yega Konseho di Konsulta ku petishon pa “spoedadvies”, siendo – ku un bon planifikashon – por a evitá algun di a bira “spoedadvies”.

Sra. Lizanne Dindial tabata kompañá pa miembronan di Konseho di Konsulta, sra. Charlene Alberto i sr. Luigi Virginia.