Awe djaweps lo repartí detektor di huma grátis

Brantwer Kòrsou ku e kampaña: “Brantwer den bo Bario” ta kontinuá ku éksito

Willemstad, 8 di òktober 2025 – E kampaña di Brantwer Kòrsou “Brantwer den bo
Bario” ta kontinuá di forma eksitoso. Despues di dos enkuentro fruktífero na Barber i
Brievengat, kaminda hopi habitante a partisipá, e aktividatnan a mustra klaramente ku
e komunidat ta interesá den seguridat i prevenshon di kandela. Brantwer ta sumamente
satisfecho pa e kantidat di públiko ku a presentá na ámbos enkuentro i esaki a duna
sigur un satisfakshon pa kontinuá ku mas fecha den barionan rònt Kòrsou.
E próksimo evento ta programa pa djaweps 9 di òktober 2025, ku distribushon di
detektor di huma GRATIS ku lo kuminsá for di 6’or di atardi na Punda. Durante di e
evento aki, alrededor di 7’or di anochi lo tin un charla informativo riba e patio di
Ministerio di Hustisia, kaminda temanan di prevenshon di kandela lo ser trata di forma
amplio.
E anochi aki lo ta yen di aktividatnan pa grandi i chikí. Lo tin bouncer pa mucha, pèchi
i regalonan di Brantwer pa muchanan, i oportunidat pa paga kandela den un
manera kontrolá i edukativo. Tambe, vehíkulonan di Brantwer Kòrsou lo tei pa pueblo
por saka potrèt i siña mas tokante nan funshon.
Ademas, lo repartí flyer i folder di informashon pa stimulá konsenshi riba importansia
di prevenshon di kandela. Bou di e lema “Prevenshon ta e mihó opshon”, Brantwer
Kòrsou ta konta ku apoyo di Minister di Hustisia, mr. Shalten Hato, ku tambe lo ta
presente mañan anochi pa duna splikashon i e importansia dikon mester ta prevení na
tur momentu.
Brantwer Kòrsou lo ta nèt na e parkeerplaats di Ministerio di Hustisia, pega ku warda di
polis na Punda, unda lo tin bon ambiente i hopi pa siña di Prevenshon. Durante Punda
Vibes di awe djaweps, lo tin tambe diferente agrupashon musikal pa trese ambiente,
vários stènt di kosnan di kome i bebe, pues un ambiente formidabel, unda por bini ku
hinter famia, keiru unratu i tuma informashon balioso di Brantwer Kòrsou.