Prome Minister mr. Mike Eman, a asisti na e ceremonia special y a expresa su gratitud na Marriott pa nan esfuerso pa logra e meta grandi cu Gobierno a pone pa inclui cada aspecto cu ta haci Aruba unico, memey di tur e desaroyo cu ta tumando luga.. Esaki ta alinea cu e meta di gobierno Nos naturalesa ta forma parti crucial di esaki y cada esfuerso cu haci na beneficio di nos naturalesa, ta un stap mas cerca di e obhetivo di gobierno.

Marriott a demostra su compromiso door di crea un Shoco Garden riba nan propiedad caminda cu tin neishinan di shoco, pa cual Prome Minister Eman ta hopi agradecido. Ademas Prome Minister Eman a gradici Greg Peterson di Aruba Birdlife Conservation pa ta un pionero den e lucha pa proteccion di nos shoco y pa pone e shoco di Aruba riba mapa.

Ta hopi importante cu sector priva ta adopta e concepto di con nos por convivi cu naturalesa y e responsabilidad pa conserva locual ta di nos y na unda por, hasta recupera locual a bay perdi caba. Desaroyo tur rond di Aruba a percura pa perdida grandi di nos matanan, y e meta ambicioso pa planta cien mil mata tur rond di Aruba den e siguiente 4 aña y logra conserva 500 neishi di shoco, ta posibel solamente cu sosten di sector priva y stakeholders. Te na e momentonan aki tin 200 neishi di shoco rond di Aruba cu ta registra, pero mester yuda proteha mucho mas.

E compromiso di entidadnan grandi manera Marriott, ta duna un empuhe na e plan importante aki. Mantencion di e cantidad di acomodacion turistico cu tin awe, ta crucial pa duna espacio pa recupera otro parti di e conceptonan di desaroyo cu no a cana semper man den man cu desaroyo di turismo. Nos tin un infrastructura bao presion, waste water management ta bao presion, vivienda ta bao presion, tin un presion enorme riba e mercado laboral pa falta di personal. Ademas ta sinti for di comunidad, cu si no atende cu nos naturalesa y nos identidad y cultura, nos lo perde e simpatia y sosten di e industria turistico.

Gobierno, mientrastanto ta preparando pa un dialogo nacional cu e sector hotelero y ta spera cu pronto por trece tur partner hunto pa delinea e direccion den cual hunto nos kier cana y den cual prosperidad comparti ta central, mescos cu proteccion di naturalesa, pero tambe unda por acomoda aspiracionnan y ambicionnan di henter e pueblo pa comparti den e bienestar di nos comunidad.