Parlamento di Kòrsou a konmemorá pa promé biaha, dia di Outonomia, ku un reunion solèm.

Djabièrnè, 10 di òktober 2025, Kòrsou ta selebrá awe 15 aña di Outonomia den Reino Ulandes, i den kuadro di esaki, Parlamento di Kòrsou a tene pa promé biaha un reunion solèm, riba Dia di Outonomia.

Pa e reunion aki, Presidente di Parlamento, sr. Fergino Bownbill, a invitá 3 alumno di skol sekundario pa duna un diskurso kòrtiku tokante tópikonan spesífiko relashoná ku outonomia di nos Pais Kòrsou.

A kontinuá e reunion ku diskursonan di kada lider di Frakshon; Sra.Giselle Mc William (MAN-PIN); sr. Quincy Girigorie (PAR); sra. Ruthmilda Larmonie-Cecilia (PNP) i sr. David Seferina (MFK), siguí pa un diskurso di Minister Presidente sr. Gilmar Pisas.

Presidente di Parlamento sr. Brownbill tabata e último riba lista di orador. Durante su diskurso, sr, Brownbill a introdusí e premio nobo ‘Premio Kokolishi Papiadó’, kual ta para pa diálogo i kompromiso sivil. E tres hóbennan ku a mustra nan balentia pa para den sala di Parlamento i hasi nan presentashonnan, a bira e promé hóbennan ku a risibí e premio aki.

E hóbennan ku a risibí ‘Premio Kokolishi Papiadó’ ta: Niasothy Hoek di Scholengemeenschap Otrobanda, Zavian Margaretha di Dokter Albert Schweitzer havo/vwo i Destiny Kwidama di Scholengemeenschap Otrobanda.

Despues di e Reunion Solèm, Miembro di Parlamento a sigui pa e seremonia ofisial di selebrashon 15 aña Outonomia, organisá pa Ministerio di OWCS na Hendrikplein.

Durante e seremonia, Gobièrnu a hasi entrega di ‘Krus di Mérito’ na e lastu Minister Presedente di Antia, Sra. Emily de Jongh-Elhage i Sra. Lisa Dindial ku tabata e último ‘Gezaghebber’ di Kòrsou.