Minister di Hustisia sr. Shalten Hato, tabata presente den un enkuentro den sala di Parlamento relashoná ku e un “Ora di pregunta”.

Djamars 14 di òktober 2025, Minister di Hustisia sr. Shalten Hato, tabata presente den un enkuentro den sala di Parlamento relashoná ku e un “Ora di pregunta”. Pa e enkuentro aki tabatin dos tópiko riba agènda. Riba petishon di miembro di Parlamento, sr. Quincy Girigorie, Minister Hato a kontestá preguntanan relashoná ku e promé tópiko “Estado di Seguridat (kontra kandela), “brandveiligheid” di edifisio di Servisio di Impuesto na Regentesselaan”. Despues di e kontestanan, sr. Girigorie komo petishonario a haña 2 minüt pa reakshoná i hasi pregunta adishonal riba e kontestanan di Minister Hato. Alabes algun Miembro di Parlamento mas a hasi uso dje oportunidat pa hasi pregunta adishonal, ku seguidamente sr. Hato a kontestá.

A kontinuá ku e di dos tópiko “Konfiansa di pueblo den Ministerio Públiko”, esaki riba petishon di miembro di Parlamento, sra. Giselle Mc William. E titular di Hustisia a kontestá e preguntanan di sra. Mc William. Pa e tópiko aki, sra. Giselle Mc William komo e persona ku a hasi petishon, tambe a haña 2 minüt pa reakshoná i hasi pregunta adishonal riba e kontestanan ku e la risibí di Minister Hato. Na final, algun Miembro di Parlamento mas a hasi pregunta adishonal, ku sr. Hato a kontestá, promé ku Presidente di Parlamento a sera e enkuentro.