E GRAN APERTURA DI KAMPIONATO HUBENIL 25-26 LO TUMA LUGÁ DJABIÈRNÈ 17 DI ÒKTOBER 2025 DEN STADION RIGNAAL FRANCISCA!
E GRAN APERTURA DI KAMPIONATO HUBENIL 25-26 LO TUMA LUGÁ
DJABIÈRNÈ 17 DI ÒKTOBER 2025 DEN STADION RIGNAAL FRANCISCA!
Despues di un temporada largu sin Kampionato Hubenil, nos ta kla pa ranka sali!
Kampionato Hubenil 25-26 lo inisiá djabièrnè 17 di òktober 2025 den gran forma. Nos lo kuminsá e atardi ku un desfile chikí di nos ekiponan ku lo partisipá e aña aki, akompañá pa Volume Brassband. Seguidamente e parti ofisial lo tuma lugá ku palabranan di presidente di FFK ku presidente di Komishon Hubenil i nos lo kulminá e atardi ku un tremendo show di grupo di baile D’Art. Despues, bala lo kuminsa lorá ku 2 partido di U-9 i 2 partido di U-11 den Stadion Rignaal ‘Jean’ Francisca p’asina duna inisio na nos Kampionato Hubenil.
E biaha aki Kampionato Hubenil ta konta ku un total di 18 klup ku ta partisipá i ta kompetí ku un òf mas tim den kategoria U-9 te ku U-21.
E aña aki manera e añanan anterior, Kampionato Hubenil lo tuma lugá na diferente tereno rònt Kòrsou, for di Banda Riba te na Banda Bou. Tur wikènt for di den oranan trempan di mainta te den oranan di anochi, nos hóbennan lo praktiká nan deporte preferí i kompetí ku otro na un manera sano i safe.
E klupnan ku lo partisipá e aña aki ta;
- Atletiko Saliña
- Atomic
- Centro Barber
- Centro Juve
- C-Stars United
- Inter Willemstad
- Jong Colombia
- Jong Holland
- Mahuma
- New Song
- Scherpenheuvel
- Sithoc
- Stallions FC
- Subt
- UD Tera Kòrá
- Undeba
- Vesta
- Victory Boys
Skema hubenil pa apertura;
Un invitashon ta bai na pueblo di Kòrsou kompletu pa asistí djabièrnè awor na e gran apertura di Kampionato Hubenil 25-26 inisiando for di mitar di 6 di atardi den Stadion Rignaal ‘Jean’ Francisca.
Bin presensiá e partidonan inisial di esnan mas chikí den nos famia di futbòl!
Komishon Hubenil i FFK ta warda bo…tur partido ta grátis!
16 òktober 2025
