Penúltimo Seshon Health =Wealth Salú ta Rikesa Pone Fronteranan Saludabe

Riba djasabra 11 di òktober a tuma lugá na Seda e penúltimo seshon di e proyekto Health = Wealth Salú ta Rikesa. Durante e entrenamentu/tayer “Setting Healthy Boundaries,” sikólogo Dr. Lindon Marselia a splika na un manera kla i inspirativo e diferensia entre pordon i rekonsiliashon. Pordon i rekonsiliashon ta dos proseso diferente. Hopi bia ta menshoná “pordon” i “rekonsiliashon” den e mesun rosea, pero nan no ta meskos. Pordon ta un proseso interno i un eskoho personal. Bo ta pordoná prinsipalmente pa bo mes, pa libera bo rabia, renkor i doló. Pordon ta un regalo pa bo mes; no ta nifiká ku bo ta aprobá e komportashon di e otro persona, pero ku bo ta libra bo mes di e karga emoshonal. Pordon ta rekerí solamente un partido: bo mes. Bo por asta pordoná un hende ku no ta na bida mas òf ku no ta realisá ku nan a hasi bo doló. Rekonsiliashon, di otro banda, ta un proseso di relashon entre dos persona. E ta rekerí kompromiso mutuo, habrimentu, i e restourashon di konfiansa. Rekonsiliashon, pues, ta rekerí dos partido. E otro partido mester ta dispuesto pa tuma responsabilidad y tuma accionnan cu ta restaura confiansa. Sin e boluntat aki, rekonsiliashon no ta posibel. Den kòrtiku: Pordon ta libra bo kurason. Rekonsiliashon ta restorá e relashon. Finalmente, e partisipantenan a wòrdu enkurashá pa move i a partisipá den un seshon di entrenamentu di selebro dirigí pa Sr. A. Luisa. E tabata un enkuentro inspirativo i balioso, den kua e partisipantenan a partisipá aktivamente, a hasi hopi pregunta, i a reflehá ku satisfakshon riba e splikashonnan suministrá. Kumindamentu. R. Victoria Inisiadó i Lider di Proyekto, Health = Wealth Salú ta Rikesa