Delegashon di komishon fiho di Tráfiko, Transporte i Planifikashon Urbano na Bogotá den kuadro di implementashon di e proyekto di Mi Kas Awor.

Djaluna, 27 di òktober 2025, delegashon di e komishon fiho di Tráfiko, Transporte i Planifikashon Urbano di Parlamento ta realisando un biahe di trabou na Colombia, Bogotá. E programa ta kana di 27 di òktober 2025 pa 31 di òktober 2025. E komishon aki ta konsistí di Presidente di komishon, sr. Lourens i miembronan sr. Thode, sr. Osepa, sr. Elhage i sra. Camelia-Römer. E delegashon ta ser sostené pa e sekretario dje komishon.

E promé dia a kuminsá ku un enkuentro ku Simón Gaviria Muñoz. Entre 2014 i 2017 Simón Gaviria Muñoz a fungi komo presidente di e Departamento Nashonal di Planifikashon (DNP) i a traha hopi di aserka ku e Ministerio di Bibienda bou di mando di Luis Felipe Henao i despues Jonathan Malagón. E último nan aki a konsolidá e programa di “Mi Casa Ya”, kaminda Simón Gaviria den e ròl di DNP a duna struktura tékniko i ekonómiko na e programa.

Durante e enkuentro aki e delegashon a risibí informashon tokante di e programa “Mi Casa Ya” na Colombia i kon esaki a desaroyá su mes ku tempu. E diferente miembronan a haña oportunidat pa hasi pregunta i risibí kontesta. Un aspekto hopi importante ku a bini dilanti ta pa hasi e programa di Mi Kas Awor un maneho nashonal i pone e sènnan disponibel den presupuesto. Esaki ta pone ku e programa no ta dependé di kambionan polítiko.

Despues di mèrdia e delegashon a bishitá e zona di gobernashon na Bogotá i a haña un rekorido breve den e edifisio di Senado i e Kámara di Representantenan. E rekorido tabata bou di enkargo di sekretario di “Comisión Sexta” di e Kámara di Representantenan, Raúl Fernando Rodríguez. Despues di e rekorido, e delegashon a risibí un presentashon den e sala di e komishon ariba menshoná. Riba pregunta di miembronan, Raúl Fernando Rodríguez a menshoná ku na su opinion ta hopi bon pa hinka den un lei e maneho di un programa di bibienda manera esun di Mi Casa Ya i di Kòrsou Mi kas Awor. Esaki ta algu ku lamentablemente Colombia no a hasi.