Djabièrnè, 31 di òktober 2025, e delegashon di komishon fiho di Tráfiko, Transporte i Planifikashon Urbano di Parlamento a konkluí e programa na Bogotá ku bishita na Ciudad Verde i CAMACOL.

Ciudad Verde ta un makro proyekto di konstruktornan privá, basá riba un lei Nashonal. Den a kaso aki e kompanianan di konstrukshon a literalmente konstruí un siudat riba un tereno di 328 hèktar ku mas ku 53 mil bibienda. Ciudad Verde ta kontené tur fasilidat manera skol (públiko i privá), hòspital, sentronan di rekreashon, sentro komersial i asta un misa. E delegashon primeramente a haña un presentashon di e historia kompletu di Ciudad Verde pa despues tuma nota di un apartamento modelo i sigui ku un rekorido den bùs dor di e siudat. Atraves di programa di Mi Casa Ya tabatin hopi famia ku a haña bibienda akinan. E delegashon por a informá nan mes di tur e hopi aspektonan positivo i tambe e retonan ku durante i despues di e konstrukshon a topa kuné. Retonan ku a keda menshoná ta p.e. transporte públiko i e parti sosial kaminda famianan mester a siña biba banda di otro.

Na CAMACOL mas lat di atardi, e presentashon tabata na enkargo di e Gerente Regional, sr. Edwin Jaime. CAMACOL ta un organisashon ku ta representá kontratistanan fo’i chikí te ku grandi ku ku hopi aña di eksperensia. Sr. Edwin Jaime a laga e delegashon indiká unda nan enfoke lo ke ta, pa di einan splika fo’i un punto di bista di kontratistanan kiko tabata e gran éksito di un programa manera Mi Casa Ya, kompará ku otro programanan. Pa e aktornan prinsipal, ku ta kontratistanan, institutonan finansiero (Banko) i Gobièrnu, den kualke programa di bibienda ta sumamente importante pa tin transparensia i konfiansa. E maneho mester ta simpel formulá i aplikabel pa tur gremio den un komunidat.

E delegashon por mira bèk riba un siman karga ku informashon i eksitoso.