Kódigo oraño: Servisio Meteorológiko Kòrsou ta sigui Tormenta Tropikal Bret hopi di aserka.


Kódigo Oraño: Servisio Meteorológiko Kòrsou ta sigui 

Tormenta Tropikal Bret hopi di aserka.
Willemstad – 200 Kilometer sur-ost di Trinidat a desaroyá awe e tormenta tropikal Bret. E sistema ta move direkshon di islanan ABC i Meteo ta mónitor e sistema pa posibel desaroyonan. 

E segundo tormenta tropikal di 2017 ku yama Bret lo por tin efekto riba Islanan ABC e dianan ku ta bini i ta p’esei Meteo Kòrsou a deklará e status di alerta “Kódigo Oraño”.

Ta spera ku mañan (djamars) anochi e sistema nort di islanan ABC lo pasa den direkshon wèst. Meteo ta sigui e desaroyo di e sistema hopi di aserka i ta informá komunidat tokante di e desaroyo den media. 

Riba djaluna 19 di yüni tim di kalamidat bou di enkargo di Sr. Lesley Fer (Rampencoordinator) a bini huntu pa informá minister di Asuntunan General Suplente Drs. Marilyn Alcalá-Wallé tokante e situashon. Den ousensia di Promé Minister Eugene Rhuggenaath- ku ta riba biahe di trabou den kuadro di OAS na México e siman aki – bou di kual e kordinashon di e tim di kalamidat ta kai, minister Alcala-Wallé ta enkargá temporalmente ku e funshon di hefe di e tim di kalamidat.
Via website http://www.meteo.cw por lesa informashon aktual i asina sigui e desaroyonan tokante di e sistema tropikal. Tambe via Facebook-pagina Meteo Curaçao por sigui e desaroyonan aktual. Bo por download un App grátis den e App store, ku yama CURACAO WEATHER i KALAMIDAT. Aki nan por haña tur informashon importante manera instansianan di emergensia i number di telefòn.

Minister Alcalá-Wallé ta supliká tur habitante di Kòrsou pa hasi preparashonnan pa e periodo di orkan aki. Instansianan manera Uitvoeringsorganisatie Openbare Werken (UOOW) a haña instrukshon pa evaluá aria di riesgo i limpia esakinan, mas pronto ku ta posibel, si ta nesesario.

Awe i mayan mainta e tim di kalamidat – konsistiendo di entre otro miembronan di Meteorologische Dienst, SOAW, Korpspolitie, Brandweer, Bureau Telecommunicatie, Rode Kruis, UOOW en Aqualectra – lo tene reunion pa sigui e situashon i duna komunidat e informashon nesesario mas pronto posibel. 

Ta súplika komunidat pa sigui medio di komunikashon pa mas informashon tokante di Tormenta Tropikal Bret. Nos ta den temporada di orkan i ta p’esei ta avisá komunidat pa tuma e siguiente medida di prekoushon.

1. Kontrolá si plachi di zink òf galvanisá ta bon pega riba bo dak; kontrolá hurricane shutters, haknan, rèndunan i drecha nan si mester. 

2. Kumpra saku di plèstik èkstra pa protehá dokumentonan, kuadronan, ekipahe i meubel kontra di awa. 

3. Kòrta palunan ku ta den kontakto ku waya di koriente òf ku ta kologá riba bo kas i otro edifisio.

4. Tene kuminda èkstra den kas, spesialmente kuminda ku mester tiki preparashon. 

5. Tene stòk èkstra den kas manera larsnan, regenjas, flèshlait bateria, radio portátil, lampinan i medisina.  

Gobièrnu lo sigui mónitor e situashon anto lo tene públiko informá.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: