Preguntanan na Minister President riba eksonerashon di Ontvanger pa papia ku Parlamento.

Na: Presidente di Parlamento di Kòrsou
Sr. F.Brownbill
Wilhelminaplein 4
Presente
Willemstad, 10 novèmber 2025
Tópiko: Preguntanan na Minister President riba eksonerashon di Ontvanger pa papia ku
Parlamento.
Honorabel sr. Brownbill, Señor Presidente, pa medio di e karta aki suskrito ke hasi uso di artíkulo 96 di Reglamentu di Òrdu i ta pidi enkaresidamente pa bo persona por dirigí e karta aki ku e tópiko;
‘Preguntanan na Minister President riba eksonerashon di Ontvanger pa papia ku Parlamento’, na Minister President sr. G.Pisas.
Atentamente,
Quincy Girigorie
Miembro di Parlamento i Lider di Frakshon di PAR
Na: Minister President
Sr. G. Pisas
Fort Amsterdam 17
Presente
Kòrsou, 10 novèmber 2025
Tópiko: Preguntanan na Minister President riba eksonerashon di Ontvanger pa papia ku
Parlamento
Honorabel sr. Pisas, Pa medio di esaki, suskrito ta aserká bo persona enkuanto lo siguiente.
Djarason 15 di Òktober último, Minister President a deklará públikamente den un entrevista na televishon ku riba e fecha ariba menshoná e tema “eksonerashon di Ontvanger, sr A. Trona”, ta riba agenda di Konseho di Minister. Tambe bo persona a deklará ku den kuadro di transparensia lo bo duna eksonerashon aki na sr Trona pa e por papia.
E eksonerashon ariba menshoná a sigi un petishon públiko di sr Trona pa por defendé su mes kontra alegashonnan hasí kontra su persona i tambe riba petishon por eskrito di varios miembro di Parlamento ku a invitá Ontvanger na un reunion Públiko den kuadro di e suseso- i deklarashonnan ampliamente konosí entre su persona i Minister di Finansa.
Den e reunion di Parlamento di djaweps 6 di novèmber último, kaminda Parlamento a invitá Minister di Finansa i tambe Ontvanger pa ta presente, Minister di Finansa sr. Cooper a informá Parlamento ku sr Trona a risibí eksonerashon di Gobièrnu pa por papia ku Parlamento.
Sinembargo el a informá Parlamento tambe, ku su persona no ta di akuerdo ku e desishon ku Konseho di Minister a tuma i ku e si lo no permiti sr Trona pa presentá den Parlamento pa papia.
Komo tal el a ninga di invitá sr Trona pa partisipa na e reunion. E deklarashon aki a lanta varios pregunta serka suskrito i otro miembronan di Parlamento.
Den e kuadro aki, suskrito ta aserka bo persona ku e siguiente preguntanan.
1. Minister por konfirmá na suskrito si Konseho di Minister a duna Ontvanger sr A.Trona
eksonerashon p’e por papia ku Parlamento? Ki fecha e eksonerashon aki a wòrdu otorgá?
2. Minister por informa suskrito kua ta e kondishonnan (ku por wòrdu hasí públiko) bòu di kua Ontvanger a risibí e eksonerashon?
3. E eksonerashon ta mará na un tipo di reunion ku Parlamento (por ehempel reunionnan di Komishonnan fiho, òf solamente 1 òf mas reunion)?
4. Minister por pone e eksonerashon “ter inzage” na Parlamento (eventualmente solamente e parti relevante pa parlamento) entrante 17 di novèmber próksimo pa un periodo di 1
siman?
5. Segun artikulo 4 di Reglamentu di Orden di Konseho di Minister, Konseho di Minister ta mantené “unidat di maneho”. Si Konseho di Minister a tuma e desishon pa duna sr Trona eksonerashon, e desishon aki ta konta pa henter Gabinete Pisas, esta tur Minister?
6. Kon Minister ta garantisá unidat di maneho di Gobièrnu riba e desishon tumá dor di
Konseho di Minister ariba menshoná?
7. Den kaso ku e kontesta riba pregunta nr 5 ta afirmativo, kon por ta posibel ku Minister
Cooper ta tuma un desishon kontrali na esun di Konseho di Minister públikamente
djaweps último dilanti di Parlamento di Kòrsou?
8. Kon Parlamento i komuidat mester mira desishonnan di Konseho di Minister den futuro, ku nan no tin valides i kada Minister ta “riba nan mes”?
9. Ta eksistí “Unidat di Maneho” den gabinete Pisas III, òf kada Minister ta riba nan mes?
10. Minister por konfirmá ku Gabinete Pisas III realmente ke transparensia riba e tema di
Servisio di Impuesto pa ku Parlamento i komunidat di Kòrsou i ta dispuesto na permiti
Ontvanger sr Trona papia liber ku Parlamentu pa garantisá transparensia na Parlamento
i komunidat di Kòrsou kompletu?
11. Minister por konfirmá ku Ontvanger sr Trona tin eksonerashon di Gobièrnu di Kòrsou pa e papia libremente ku Parlamentu momentu ku Parlamento hasi e petishon pa esaki den futuro?
12. Mirando e posishon tumá dor di Minister Cooper, ku de fakto a evitá ku sr Trona por
wòrdu skuchá den kuadro di e eksonerashon i pa evitá ku kualke Minister den futuro por
usa e argumento ku e no ta invitá sr Trona na reunionnan di Parlamento, Minister ta
dispuesto na duna e òutoridat na Parlamento pa invitá sr Trona direktamente pa deliberá
ku Parlamento riba tema(nan) ku ta kai bòu di e eksonerashon ya duná na su persona?
Gradisiendo di antemano pa e kontestanan mi ta keda,
Atentamente,
Quincy Girigorie
Miembro di Parlamento Partido Alternativa Real