WoMen’s Steering Committee ta ekspresá preokupashon pa situashon di agreshon kontra hende muhé

 

WoMen’s Steering Committee ta ekspresá preokupashon pa situashon di agreshon kontra hende muhé

Ta invitá pa demostrashon silensioso na Plasa Brion

WILLEMSTAD – WoMen’s Steering Committee Curaçao (WSCC) ta ta ekspresá su preokupashon relashoná ku e oumento alarmante di violensia kontra hende muhé na Kòrsou. “Agreshon i violensia, inkluso kaso di muhénan ku a ser matá, a oumentá di un forma alarmante. Esaki ta un situashon inaseptabel ku nos komunidat no por sigui tolerá i aseptá,” sra. Mirieta Lourens – de Lanoy, presidente di WSCC a bisa. “Pa mustra solidaridat den e lucha kontra violensia kontra hende muhé nos ta invitá komunidat den su totalidat pa forma parti di un demostrashon silensioso pa mustra solidaridat i konbibensia ku tur víktima di violensia riba djamars 25 di novèmber ku ta Dia Internashonal kontra Violensia di e Hende Muhé.”

Nos sosiedat ta enfrentá retonan serio, manera konsumo eksesivo di alkohòl, uso i benta di droga, abuso na trabou, i e situashon vulnerabel di muhénan den prostitushon i imigrashon ilegal. Pobresa, falta di toleransia i e influensia negativo di media sosial ta kontribuí na un ambiente di strès i inseguridat, ku e hende muhé kom esun ku ta sufri mas” Sra. Mirieta Lourens-de Lanoy,  asigui bisa.

“WSCC ta mustra ku énfasis riba importansia di e hende muhé den komunidat komo e pilá di famia. Ora neglishá e hende muhé (ku ta e mama, wela, tanchi, madrina) ta debilitá hinter e komunidat. Nos mester aktua huntu pa krea struktura di protekshon i sosten pa e hende muhé i nos hóbennan.”

WSCC ta proponé pa tuma e siguiente akshonnan konkreto:

1. Medidanan gubernamental:

• Krea un Programa Nashonal pa lucha kontra pobresa, violensia i trafikashon di hende, ku fasilidatnan pa sosten legal, kas di refugio i guia sikológiko.
• Aktualisá i re-enforsá leinan di protekshon i kolaborashon ku polis i sektor hudisial.

2. Edukashon:

• Integrá edukashon digital i resistensia den skol kontra influensia negativo di media sosial.
• Desaroyá programanan pa oumentá konfiansa, rèspèt i disiplina. 
• Fomentá koperashon entre skol i kas.

3. Komunidat:

• Organisá prográmanan di mentoring pa muhénan i hóbennan.
• Mobilisá iglesia, klupnan di deporte i barionan pa krea lugánan sigur.
• Stimulá sosten mutuo entre muhénan.

4. Forsa ekonómiko:

• Invertí den kursonan i krédito mikro pa muhénan emprendedó.
• Krea ku leinan pa protehé hende muhé kasá, muhénan ku yu òf mamanan soltera 
• Promové oportunidatnan di trabou pa muhénan ku salario hustu.

WSCC ta lansá un yamada na tur organisashon i siudadanonan pa uni forsa i traha huntu pa un Kòrsou mas sigur i fuerte pa muhénan i famianan.

“Den kuadro di Dia Mundial kontra Violensia kontra Hende Muhé nos ta invitá komunidat pa un demostrashon silensioso djamars 25 di novèmber, di 18.00 – 19.00 or na Plasa Brion (Brionplein). Nos ta invitá tur hende muhé, I hende hòmber pa bini huntu pa duna un señal kla ku mester stòp Violensia Kontra Muhé,” sra. Lourens – de Lanoy a klousurá bisando.