KUERPO POLISIAL KÒRSOU 

KOMUNIKADO DI PRENSA

457/2025

29 novèmber 2025 

Kaso di agreshon kontra mandatario investigá 

Den oranan di atardi di djárason 26 di novèmber último, a tuma lugá un kaso di agreshon  kontra di un mandatario na un establesimentu den Zeelandia. 

E insidente aki a sòru pa basta komentario i spekulashon den prensa lokal i riba  plataformanan sosial. 

Manera ta di spera di kualke persona ku a bira víktima di un echo kastigabel, manera den e  kaso aki, e minister enkestion tambe a hasi uso di e derecho ku e tin, pa hasi denunsia na  polis. 

Sinembargo, e denunsiante/mandatario a ekspresá si, ku no opstante ku e ta víktima di e  agreshon, no ta su deseo pa e persona kontra kua el a hasi denunsia, keda enkarselá. 

A base di denunsia hasí, dia 28 di novèmber 2025 polis a hasi detenshon i a interogá e dama  A.M.M.S. di 47 aña di edat nasé na Kòrsou. 

Despues di su interogashon konforme e prosedimentu penal ku polis ta realisá, kual ta unu  kompletamente independiente i transparente, el a keda lagá den libertat a base di evaluashon hurídiko usual, mientras ku e investigashon ta sigui.