Banko di Kuminda di Kòrsou
Kòrsou, 5 di desèmber 2025 – Fundashon Yudansa pa Kòrsou, mihó konosí komo Voedselbank ta lamentá ku tin hopi informashon inkorekto òf no kompletu tokante e trabou ku Voedselbank ta hasi di forma boluntario pa yuda ensnan ku tin mester di yudansa di kuminda. Semper Voedselbank ta pará habrí pa duna informashon i kontestá preguntanan, pa asina informashon ku ta sirkulá ta ofisial i verídiko.
For di algun luna kaba Voedselbank a indiká ku pa motibu di falta di fondo lo bai redusí e kantidat di famianan ku ta risibí tur luna un pakete di kuminda, di 350 pa 100. Voedselbank ta hasi esaki pa di un forma finansiero responsabel Voedselbank por keda brinda pa un temporada mas largu, un aporte chikí na esnan den mas prekansia. E adaptashon aki ta duna Voedselbank espasio di krea formanan nobo òf di forma adaptá pa por sigui yuda. Pues niun momentu so no ta e intenshon di Voedselbank pa stòp ku nos trabounan, pero si adaptá e kantidat di paketanan ku nos por yuda kuné.
No opstante tur e publisidat di medionan di komunikashon duná na e situashon, den e lunanan ku ta tras di lomba Voedselbank no a risibí donashon èkstra pa por mantené e kantidat di 350 famia, pues, Voedselbank ta hañ’é obligá di redusí entrante e luna aki na 100 famia, pues 100 pakete pa luna kuminsando desèmber 2025 pa sigui den 2026.
Voedselbank a tuma nota ku den reunion públiko di Parlamento di Kòrsou di 4 di desèmber, a menshoná Voedselbank i asina e situashon di Banko di Kuminda di Kòrsou a haña atenshon tambe di nos parlamentarionan. Voedselbank ta sigui manera semper, traha i buska formanan konkreto i duradero pa yuda e hendenan ku mas ta den nesesidat i alabes ta karga speransa ku manera ekspresá den Parlamento, gobièrnu tambe, meskos ku henter komunidat, ta aportá na Voedselbank pa asina komo komunidat kompletu nos sigui yuda.
Riba djadumingu 7 di desèmber Lady Su huntu ku Voedselbank tin un kolekta di produkto na Katedral di Sumpiña (Sta. Rosaweg) di 12or pa 6or. E kolekta aki ta yuda Voedselbank haña produkto pa sigui traha pakete pa yuda algun famia den nesesidat sigur den e temporada di fin di aña aki.
Un i tur ta bon bini pa trese algun produkto di kuminda ku nos por usa pa traha e paketenan di kuminda i asina yuda nos próhimo durante e dianan di fiesta binidero.