KUERPO POLISIAL KÒRSOU 

 

KOMUNIKADO DI PRENSA

476/2025

9 desèmber 2025 

Korekshon riba formulashon di Komunikado di Prensa 

Referiendo na Komunikado di Prensa 474/2025 ku e título “Polis a evaluá situashon di  tráfiko despues di konsierto’, Kuerpo Polisial ta deklará lo siguiente. 

Polis a tuma nota despues di a publiká e komunikado enkestion, ku tabatin formulashon di  un frase, ku no tabata sufisiente kla i no a reflehá e loke ku nos kier a indiká. 

Esta, ku durante di organisashon di e evento, no a tene sufisiente kuenta ku e kantidat di  vehíkulo ku por a permití pa stashoná den e área ei. 

Pa medio di e komunikado aki, nos ta asumí nos responsabilidat i ke enfatisá ku na  organisashon di e evento, polis ta referí na su propio organisamentu (preparashon) pa e  evento ei, kaminda ku mester a tene kuenta ku e kantidat di vehíkulo ku tabatin  aksesibilidat na e evento. 

Fluho adekuá di tráfiko riba kaminda públiko ta un responsabilidat di polis i manera a indiká  den e komunikado anterior, kuerpo lo adaptá su intervenshon den situashonnan asina i  sòru pa den futuro pa un mihó fluho di tráfiko.