Polis a evaluá situashon di tráfiko despues di konsierto
KUERPO POLISIAL KÒRSOU
KOMUNIKADO DI PRENSA
474/2025
9 desèmber 2025
Polis a evaluá situashon di tráfiko despues di konsierto
Kuerpo Polisial a tuma nota riba retnan sosial, ku e manera kon tráfiko tabata flui despues di e konsierto ku tabatin djasabra dia 6 di desèmber 2025 den area di aeropuerto, a sòru pa basta indignashon i iritashon serka tantu e públiko bishitante komo otro usuarionan ku mester a hasi uso di e parti ei di F.D. Rooseveltweg.
Mester indiká ku durante di organisashon di e evento, no a tene sufisiente kuenta ku e kantidat di vehíkulo ku por a permití pa stashoná den e area ei.
Konsekuentemente na momentu ku e aktividat terminá, ta bira difísil pa riba un solo kaminda di dos direkshon, manehá e fluho di tráfiko i sòru pa den un tempu relativamente kòrtiku, un area kongestioná asina keda aliviá di hopi outo.
Polis a evaluá e situashon ku a surgi aki i tin komprenshon tambe pa e frustrashon ku a ser kreá serka hopi hende ku mester a warda, promé ku nan por a kontinuá pa nan destinashon.
Nos a konsiderá esaki komo un momentu oportuno pa komo esun responsabel pa seguridat i libertat den tráfiko, siña for di dje i pa den futuro tuma e medidanan apropiá.
Sigur ora ta trata aktividatnan di tal magnitut, kaminda por spera pegamentu di tráfiko.