CBCS ta organisá di tres konferensia anual di Fintech na Sint Maarten

 

CBCS ta organisá di tres konferensia anual di Fintech na Sint Maarten ‘Konfiansa, Transparensia i Teknologia: Regulashon pa e siguiente ola di Fintech’ 

PHILIPSBURG – Dia 4 i 5 di desèmber 2025, Centrale Bank van Curaçao en Sint Maarten (CBCS)  a organisá su di tres konferensia anual di Fintech na Simpson Bay Resort, Philipsburg, Sint  Maarten. Parti di e konferensia di dos dia tabata un seshon privá di mesa rondó pa reguladó  riba djaweps, siguí pa un konferensia públiko riba djabièrnè ku representante di banko sentral,  inovadó i eksperto di fintech di tur parti di region di Karibe i Latinoamérika, Europa, Medio  Oriente i Asia. E konferensia a enfatisá e ròl importantísimo di Banko Sentral den formashon  di futuro di finansa.  

E aña akí, e temanan sentral a enfoká riba inovashon riba tereno di pago i regulashon di propiedat  digital, Fintech komo motor di inklushon finansiero na Latinoamérika i Karibe, stablecoin i finansa  digital, i futuro di servisio bankario, manera entre otro e desaroyonan riba tereno di ‘neobanks’. 

Tema sentral di e konferensia: Konfiansa, Transparensia i Teknologia: Regulashon pa e siguiente  ola di Fintech, a enfatisá e papel importante ku e bankonan sentral mester hunga, regulando  sistema finansiero ku futuro na bista i na un manera ku ta promové inovashon. Pasobra regulashon  ta esensial pa protekshon di konsumidó, pero un ambiente ku ta promové inovashon no ta ménos  importante. 

Den su keynote speech,1 Richard Doornbosch, Presidente di CBCS, a enfatisá ku fintech tin un  tremendo potensial pa hasi servisio finansiero bira disponibel pa e gruponan ku tin poko òf niun  akseso na servisio bankario. El a splika ku mester desaroyá un kuadro regulatorio ku ta krea espasio  i ku na mes momento ta salvaguardá stabilidat i integridat. 

Tabatin vários seshon estilo ‘fireside chat’ i panel ku a mustra riba e nesesidat di bini ku solushon  na midí pa nos retonan lokal i, si ta posibel, asta reto regional. Por a tende di e diferensianan ku tin  den e formanan di pago disponibel na Latinoamérika i Karibe, i tambe algun historia di éksito  regional di Sint Maarten, Kòrsou, Aruba i Bahamas. Un punto ku a keda bini dilanti den e  kòmbersashonnan ta e trabounan ku tin riba tereno di pago digital, ya ku te ainda, kèsh i turismo  ta hunga un ròl sentral den ekonomia tantu na Sint Maarten komo na Kòrsou. A papia brevemente  tambe riba e pro- i kontranan di Moneda Digital di Banko Sentral (na ingles, CBDC), riba sierto 

desaroyo relashoná ku ‘tokenisashon’ i loke e teknologia akí por nifiká pa derecho di propiedat  (frakshoná). Tambe a papia brevemente tokante e ròl di data center komo fasilitadó di inklushon  finansiero i e importansia di kontrol soberano riba e datonan. Por lo demas, e kòmbersashonnan  a konsentrá riba futuro di servisio bankario. Aki, e panelistanan a enfatisá e poder di koeksistensia  

1 https://www.centralbank.cw/publications/speeches-presentations

i kokreashon. E interkambionan a enfatisá e importansia di tantu banko tradishonal komo  neobanks; ámbos por sirbi komo fasilitadó di akseso na servisio finansiero pa tantu nan klientenan  eksistente komo e gruponan ku ménos akseso na servisio finansiero, i ámbos por kontribuí na  inovashon finansiero na midí. 

Na klousura di e konferensia, e representantenan di Global Blockchain Business Council (GBBC) i  The Luxembourg House of Financial Technology (LHoFT) a ekspresá e organisashonnan akí su  kompromiso pa yuda nos region aselerá desaroyo di su ekosistema di fintech i pago. Komo un  promé paso, lo mester identifiká i dokumentá e burakunan ku tin den e infrastruktura aktual di  pago, a base di e resultadonan di e konferensia. CBCS ta masha kontentu ku e inisiativa akí i ta  apoyá tur kolaborashon ku tin e meta di mehorá resiliensia finansiero di nos union monetario. 

Ku su konferensia anual di Fintech, CBCS ke kontribuí na un interkambio krítiko i al dia entre tur  stakeholder, manera inovadó, stipuladó di maneho, reguladó i públiko en general, riba desaroyo  di inovashon finansiero den e konteksto di regulashon di servisio finansiero digital pa nos union  monetario. 

Willemstad, 11 di desèmber 2025  

CENTRALE BANK VAN CURAÇAO EN SINT MAARTEN