Segun análisis di laboratorio na Hulanda, No a enkontrá kontaminashon di Hidrokarburo den saliña na Libu
Segun análisis di laboratorio na Hulanda,
No a enkontrá kontaminashon di Hidrokarburo den saliña na Libu
Willemstad – Dia 21 di yanüari 2025, Ministerio di Salubridat, Medio Ambiente i Naturalesa (GMN) a emití un komunikado tokante un video publiká den medianan sosial, kaminda ta menshoná ku den e saliña situá den área di Libu (Weg naar Bullenbaai) lo tin un kantidat grandi di petroli.
Den e komunikado, Ministerio GMN a indiká ku, apesar di e inspekshon visual, a tuma muestra di tera for di e saliña i a manda esaki pa analisá na un laboratorio sertifiká na Hulanda. E laboratorio aki ta un instansia ku diariamente ta analisá muestranan di tera segun standardnan internashonal.
Durante e proseso di análisis, a analisá diferente grupo di supstansia presente den e tera, inkluso un análisis spesífiko pa detektá presensia di hidrokarburo (zeta/ petroli).
E resultadonan di e análisis a wòrdu kompará ku e balornan mínimo ku e diferente supstansianan (inkluso hidrokarburo), por tin den un suela limpi segun normanan na Hulanda. Segun e resultadonan, no tin indikashon di kontaminashon di hidrokarburo (zeta) den e saliña situá den área di Libu.
Dia 16 di aprel 2025, a sali un rapòrt di ADC riba medianan sosial fechá 13 di òktober 2023, kaminda ta indiká ku a detektá e supstansia “Tributylfosfaat” den e suela di e saliña situá den área di Libu. Apesar ku GMN anteriormente a laga hasi un análisis esktenso di e suela, a opta pa bolbe tuma muestranan den e saliña di Libu i laga analisá esakinan na ADC, pa por verifiká si e supstansia “Tributylfosfaat” ta presente den e suela.
E resultadonan di e análisis den luna di òktober 2025, ta indiká ku no tin “tributylfosfaat” tampoko den e muestranan ku ta pertenesé na e saliña den área di Libu.
Segun análisis ku a wòrdu hasí na Hulanda i tambe na ADC por konkluí ku e suela den e saliña situá den área di Libu no ta kontaminá ku hidrokarburo i tampoko ku otro supstansianan.
###
