KUERPO POLISIAL KÒRSOU  

KOMUNIKADO DI PRENSA

483/2025

14 desèmber 2025 

Aksidente di tráfiko ku morto 

Djasabra 13 di desèmber 2025 alrededor di 13.00’or, Sentral di Polis a risibí informashon di  un aksidente bastante grave ku a tuma lugá riba Weg naar Westpunt na altura di Rab’i  Yuana i ku tabatin turistanan enbolbí. 

Mesora unidat di warda di polis di Barber i di Politur a keda dirigí pa e sitio di aksidente. Na yegada di e unidatnan nan a bin topa un hòmber drumi abou ku heridanan na su kurpa i  un dama ku tabata parsialmente pegá entre un motorsiakel di tres wil i un muraya. 

For di investigashon ku e unidatnan a hasi na e sitio, a sali na kla ku e pareha turista aki  tabata forma parti di un grupo ku tabata okupando su mes ku un paseo riba e vehíkulonan  di tres motor. E grupo tabata kore riba Weg naar Westpunt den direkshon p’ariba, esta den direkshon di Barber. 

Dado momentu, pa motibunan te ainda deskonosí, na altura di Rab’i Yuana, e motorsaikel  di e pareha turista a kore i bai dal frontal kontra di un muraya ku tin kantu di kaminda. 

Tantu e turista maskulino di kua su situashon for di e momentu ei tabata krítiko komo esun  femenino, a keda transportá ku urgensia pa Sala di Emergensia di C.M.C. pa risibí tratamentu médiko. 

Algu despues di 23.30’or, Sentral di Polis a risibí informashon ku e turista hòmber a fayesé,  a konsekuensia di herídanan ku el a sufri den e aksidente. 

Departamentu di Trafiko ta kontinuá ku e investigashon.