KUERPO POLISIAL KÒRSOU 

KOMUNIKADO DI PRENSA

484/2025

14 desèmber 2025 

Kaso di asesinato 

Djasabra 13 di desèmber 2025 alrededor di 23.47’or, Sentral di Polis a dirigí unidat di warda  di polis di Rio Canario pa Dein na altura di un trùk di pan, despues ku informashon a drenta  di un kaso di tiramentu ku persona heridá. 

Na yegada di e promé unidat, el a topa un hòmber drumí abou riba su barika i ku no tabata  duna señal di bida. 

Mesora ambulans a presentá na e sitio, pero ya e personal no por a hasi nada mas pa e  víktima. 

For di investigashon preliminar realisá, a sali na kla ku un ratu promé, un vehíkulo pretu modèl chikí a pasa i okupantenan di e outo aki a lòs tiru riba e hòmber ku a alkansé mortalmente. 

Despues e outo den kua e sospechosonan tabata, a move den direkshon di Kanga. 

Dòkter di polis ku tambe a presentá, a konstatá morto i riba òrdu di fiskal di Ministerio  Públiko, a konfiská e kurpa pa mas investigashon.