Polis ta hasi yamada pa ta mas kouteloso den tráfiko
KUERPO POLISIAL KÒRSOU
KOMUNIKADO DI PRENSA
485/2025
14 desèmber 2025
Polis ta hasi yamada pa ta mas kouteloso den tráfiko
Kuerpo Polisial ta bolbe hasi un súplika na prinsipalmente usuarionan di kaminda públiko, pa bai mas kouteloso den fin di aña aki.
Tradishonalmente den fin di aña tin mas konsentrashon di tráfiko den sierto áreanan i mas nos ta yegando e dianan di fiesta, hopi outomobilista tin hansha pa nan move di un punta pa otro.
E komportashon aki ta sòru pa mas aksidente ku normal, debí ku mas reglanan di tráfiko ta keda violá.
E violashonnan di lei di tráfiko ku mas ta bini dilanti ta:
⮚ Pasamentu den lus kòrá.
⮚ Falta di preferensia.
⮚ Ekseso di velosidat.
⮚ Papia na telefon ku esaki na orea òf den man.
⮚ Kore outo bou di influensia di alkohòl.
Tin hopi aksidente tambe den kua e víktimanan ta sufri mas daño personal òf te asta ta keda mankaron, debí ku sea nan no tabatin nan faha di seguridat bistí òf den kaso di motosiklistanan, nan no tabatin un hèlmu (adekuá) pa protehá nan kabes.
Un bia mas e apelashon na un i tur pa nos keda mantené kalmu, sigui reglanan di tráfiko, pa nos tur por disfrutá di dianan di fiesta huntu ku nos sernan kerí i habri un aña nobo den harmonia i felisidat.
