Kòrsou i Aruba ta duna start pa desaroyo di un konekshon ku fèri entre e dos islanan
Desaroyo Ekonómiko
Kòrsou i Aruba ta duna start pa desaroyo di un konekshon ku fèri entre e dos islanan
Publiká riba 17 Desèmber 2025
Un paso signifikativo den direkshon di kooperashon marítimo duradero
Willemstad/Oranjestad, 16 desèmber 2025 – Pa fortalesa e laso ekonómiko i sosial entre Aruba i Kòrsou, Minister Roderick Middelhof (Minister di Desaroyo Ekonómiko, Kòrsou) i Minister Geoffrey Wever (Minister di Finansa, Asuntu Ekonómiko i Sektor Primario, Aruba) a duna formalmente e inisio pa e desaroyo di un konekshon di fèri entre e dos islanan. E inisiativa aki ta representá un paso esensial pa integrashon regional, mobilidat i un kooperashon marítimo mas amplio.
E Konseho di Minister di e dos paisnan a aprobá e Plan di Akshon. Ku esaki, Hulanda tambe a aprobá e petishon pa finansiamentu via ‘Landspakket’, loke ta pone disponibel un suma di supsidio pa e promé fase di e trayekto.
E proyekto ta inkluí un estudio di faktibilidat konhunto, ku tin den su alkanse preparashon i ehekushon di un destaho públiko. Meta final ta pa atraé un operador di fèri kompetente ku por ofresé un konekshon konfiabel i futuro resistente entre Aruba i Kòrsou.
Den e siguiente periodo, lo tuma lugá un serie di análisis tékniko, ekonómiko i ekológiko, tambe un diálogo struktural ku stakeholdernan. Si e resultado ta positivo, lo sigui ku e proseso di destaho públiko, ku meta final pa otorgashon na un operador den 2026.
“E proyekto aki ta reflehá nos ambishon pa fortalesa i amplia nos koperashon ekonómiko i turístiko den region. Un konekshon ku fèri entre nos islanan no ta solamente un medio di transporte, pero un brùg pa kresementu duradero i un laso regional mas fuerte,” segun Minister Roderick Middelhof di Kòrsou.
Minister Geoffrey Wever di Aruba a ekspresá: “Mi ta partikularmente satisfecho ku e proyekto aki ku nos ta desaroyá huntu ku Kòrsou i Hulanda. Un bon konekshon entre Aruba i Kòrsou, pa persona i pa karga, lo trese benefisio direkto pa nos ekonomia i pa nos siudadano. Kooperashon regional ta birando mas i mas importante, spesialmente mirando e desaroyonan geopolítiko den nos region.”
