National Payment Council komprometí pa informá merkado riba  opshon di pago 

WILLEMSTAD/PHILIPSBURG — Komo un resultado prinsipal di e segundo reunion di National  Payment Council (NPC) na 2025, a disidí pa huntu organisá un seshon informativo pa  komunidat empresarial riba e opshonnan nobo di pago ku ta disponibel. Na Sint Maarten, e  reunion a tuma lugá dia promé di desèmber i na Kòrsou dia 9 di desèmber, na Centrale Bank  van Curaçao en Sint Maarten (CBCS). A trata vários otro tema relashoná ku sistema di pago,  entre otro, gastu lokal di transakshon ku karchi, froude ku pago i e funshonalidatnan adishonal  di Instant Payments ku por implementá den futuro.  

Tin kada bes mas opshon di pago inovativo ta bira disponibel na Kòrsou i Sint Maarten, por  ehèmpel, pago via lenk digital i QR-code. E desaroyo akí ta positivo. E opshonnan akí ta ofresé un  manera rápido, kumbiniente i efisiente pa e konsumidó- i negoshinan hasi transakshon. Pero no  ta tur empresario ta na altura di nan i esei por nifiká gastu innesesario i ménos fasilidat di pago pa  e konsumidó. P’esei, e miembronan di NPC a tuma e inisiativa pa konhuntamente organisá un  seshon informativo pa komunidat empresarial riba e opshonnan nobo di pago. 

Komo un di e resultadonan prinsipal di e reunionnan di NPC ku a tuma lugá na yüni 2025, a lansa  un kampaña konhunto di konsientisashon tokante froude ku pago. Tin vários tipo di riesgo mará  na e métodonan inovativo di pago ku ta disponibel. Un di nan ta froude ku pago online. E tipo di  froude akí por hiba na pèrdida finansiero i pone públiko pèrdè konfiansa den pago digital. Na  novèmber 2025, NPC a lansa un kampaña online di konsientisashon tokante froude ku pago  online, splikando kiko bo por hasi na momento ku bo haña bo konfrontá ku e fenómeno akí.  Mirando kon importante e kampaña akí ta pa komunidat, NPC a disidí ku lo ripitié den 2026. 

Por último, a trata e desaroyonan riba tereno di Instant Payments. Ta usando e teknologia akí kaba  pa prosesá transakshon lokal di un banko pa otro den tempu real. Ku e sistema akí, por hasi pago  den tienda online, den tienda físiko i di un persona pa otro, na un manera mas ekonómiko i sin  mester usa un karchi di pago. Pero e teknologia akí ta ofresé tambe e posibilidat di hasi pago  internashonal instantáneo entre Kòrsou i Sint Maarten, Boneiru, Aruba i Hulanda. Den 2026, CBCS  lo eksplorá e posibilidatnan akí. 

Un danki di CBCS ta bai na e miembronan di NPC pa nan partisipashon aktivo na e reunionnan. Ku  plaser, CBCS lo sigui traha huntu ku NPC pa mehorá sistema di pago na Kòrsou i Sint Maarten. 

Willemstad, 18 di desèmber 2025 

CENTRALE BANK VAN CURAÇAO EN SINT MAARTEN 

NPC ta un plataforma riba kua e outoridatnan kompetente, CBCS i e otro partidonan interesá ta  dialogá riba maneho di sistema di pago, ku un representashon balansá di interes públiko i privá.  Membresia di NPC ta limitá na e outoridatnan kompetente i un grupo núkleo di instansia ku ta  ser konsiderá relevante pa e kuestionnan spesífiko ku ta siendo tratá. Nan ta konsistí entre otro  di representante di e suministradónan di servisio di pago, manera e asosiashonnan di bankero di  Kòrsou i Sint Maarten i Curaçao Fintech Association, i e institutonan ku ta representá e  usuarionan di servisio di pago di e dos Paisnan, manera entidat di gobièrnu, kompania di utilidat,  i asosiashonnan di konsumidó i di negoshi.  

Tambe, NPC ta sirbi komo e lugá kaminda e suministradónan di servisio di pago (PSP) i  usuarionan por ekspresá nan mes i interkambiá riba nan deseo- i retonan, i kisas transformá  esakinan den funshonalidat nobo pa nos sistema di pago. E ophetivonan prinsipal di NPC ta:  desaroyo di maneho, siguridat i efisiensia, inklushon finansiero, interoperabilidat, informashon i  konsientisashon.