Djaweps, 18 di desèmber 2025, tabata e último dia ku Parlamento a trata e Ordenansa di Presupuesto di Pais pa aña di servisio 2026 (Ontwerplandsverordening tot vaststelling van de begroting van Curaçao voor het dienstjaar 2026).

Despues di a reanudá e reunion mainta, a kuminsá mesora ku Minister Sithree van Heydoorn ku a kontestá e preguntanan di promé tanda riba kapítulo 16 di ministerio di Enseñansa, Siensia, Kultura i Deporte. A kontinuá ku e di dos tanda di pregunta, ku Minister van Heydoorn a kontestá mesora.

Seguidamente Miembronan di Parlamento a risibí e kontestanan di promé tanda di Minister di Desaroyo Ekonómiko, sr. Roderick Middelhof, riba kapítulo 15 di e Presupuesto, siguí pa e di dos tanda, kaminda Minister Middelhof a kontestá e preguntanan.

Por último, Minister di Salubridat Públiko, Medio Ambiente i Naturalesa, sr. Gilmar Pisas, a kontestá e preguntanan di promé tanda riba kapítulo 18, siguí pa preguntanan adishonal di Miembronan di Parlamento den e di dos tanda, ku tambe sr. Pisas a kontestá.

Na final di e deliberashon Presidente di Parlamento sr. Fergino Brownbill, a pasa pa vota primeramente riba dos amienda riba e proyekto di Lei di Presupuesto, despues ku Gobièrnu a duna su opinión riba e amiendanan. E promé amienda a keda rechasá, miéntras e di dos amienda a ser aprobá pa Parlamento.

Presidente di Parlamento a sigui ku votashon riba e diferente kapítulonan i finalmente riba e proyekto di Lei den su totalidat. E presupuesto di Pais pa aña di servisio 2026 a keda aprobá ku 14 voto pro i 6 voto kontra.

Tambe Miembronan di Parlamento a entregá un total di 11 moshon ku a ser tratá un pa un. Di e 11 moshonnan, 4 a ser aprobá i 7 rechasá.

Riba proposishon di Presidente, Parlamento a bai di akuerdo pa a trata un punto di agenda adishonal kual ta ‘Deliberashon ku Minister Presidente enkuanto e “Nationaal Convenant inzake de maatschappelijke discussie met betrekking tot de indexatie van de AOV-uitkering”, i ehekushon di esaki dor di Gobièrnu i SVB’.

Despues di dos tanda di deliberashon Parlamento den su totalidat a bai di akuerdo pa Gobièrnu huntu ku SVB ehekutá e kombenio ku a yega ku e grupo di representantenan di e penshonadonan.

Riba e tópiko aki tambe miembronan a entregá dos moshon, di kual tur dos a keda rechasá.