Beehives a organisá di 15 pa 19 di dezèmber un siman di workshop gratis

Willemstad, 21 dezèmber 2025
Beehives, komo organisadó di Karnaval, a organisá di 15 pa 19 di dezèmber un siman di workshop gratis, ku tur material disponibel, ku e propósito di siña personanan interesá e fishi di kose i asina chispa e interes pa e arte di traha pa Karnaval.
Pa e workshop ta tin un nivel haltu di interes i partisipashon. Durante e siman, e kursistanan a haña konosementu básiko i práktiko ku por sirbi komo fundeshi pa den futuro kontribuí komo kosedónan na Karnaval.
E reakshonnan di e partisipantenan ta mustra ku e inisiativa a resultá hopi positivo, i hopi di nan a terminá e workshop kontentu i motivá pa sigui desaroyá nan abilidatnan.
Beehives ke ekspresá su gradisimentu na kada partisipante pa nan entusiasmo, dedikashon i konfiansa.
Huntu nos ta sigui traha pa fortalesé Karnaval i krea oportunidatnan pa talento lokal.
Masha danki.