Minister di BPD ta garantisá outonomia di Konseho Supremo Elektoral

Willemstad.- Minister di BPD, Kimberly Lew-Jen-Tai  ta enfatisá ku ta di gran importansia pa tin un Konseho Supremo Elektoral independiente i ku ta funshoná bon, komo parti esensial di estado di derecho di Kòrsou.

 

Akonsekuensia di notisianan resiente den media kaminda Konseho Supremo Elektoral a indiká ku a kòrta den nan presupuesto di 2026 i ku esaki tin konsekuensia pa e instituto su funshonamentu, minister Lew Jen Tai a invitá sekretario di Konseho Supremo Elektoral, Sheryl Losiabaar pa un reunion.

 

Meta di e reunion tabata pa minister pone su mes kompletamente na altura di e retonan ku e instituto ta konfrontá i pa yega na solushonnan definitivo i duradero.

 

Sra. Losiabaar tabata kontentu ku minister riba un plano kortiku asina’ki a sa di yama e reunion pa buska solushonnan konkreto.

 

Minister Kimberly Lew-Jen-Tai a enfatisá ku Konseho Supremo Elektoral ta un organo outonómo ku pa lei tin sierto responsabilidat i tareanan krusial manera entre otro:

• Preparashon i organisashon di elekshonnan.
• Supervishon, Konseho i Informashon na públiko.

E tareanan akí ta eksigí stabilidat, profesionalismo i sufisiente rekurso pa por garantisá kontinuidat i konfiabilidat di e proseso elektoral.

 

Minister ta duna hopi balor i rèspèt na e tareanan legal i independiente di Konseho Supremo Elektoral i a enfatisá ku di niun manera prosesonan di entre otro presupuesto por pone e instituto su tareanan legal bou di preshon.

Transparensia, diálogo i komprendementu mútuo ta e prinsipionan ku tin di sirbi komo base.

 

E reunion akí ta kai netamente den kuadro di e responsabilidat di e minister pa sigurá un gobernashon públiko ku ta funshoná bon, kaminda institutonan independiente por kumpli ku nan papel di un manera efektivo i sin obstákulo.

Minister a primintí ku pa dia 2 febrüari na momento ku Konseho Supremo Elektoral tin di entregá su presupuesto di 2027, lo sòru pa e situashon akí ta korigí tantu pa 2026 i futuro.