Ekspanshon temporal di kapasidat di taksi

Willemstad – Ministerio di Tráfiko i Transporte I Planifikashon Urbano (VVRP) ta informá ku durante e temporada haltu di turismo, lo ampliá temporalmente e kapasidat legal di servisio di taksi. Minister Charles Cooper a bini ku eksonerashon temporal aki pa atendé ku e demanda haltu pa ku transporte di turista aki na Kòrsou. Entrante 14 di yanüari 2026 por kuminsá hasi petishon.

E propósito di e medida aki ta pa respondé na e oumento di demanda di transporte durante e temporada haltu, sin mester realisá un ekspanshon struktural di kantidat di pèrmitnan di taksi, konsiderando ku e lei nobo pa esaki ainda ta den proseso.

Pa esaki ta aplikabel, e eksigensianan ta :

– E shòfùr ousiliar mester ta registrá riba e lista ofisial di espera pa taksi.

– E shòfùr ousiliar ta kumpli ku tur rekisitonan segun artikulo 12 di e ordenansa Insular di Transporte di Persona.

– E dispensashon ta válido pa un máksimo di seis (6) luna, ku ta korespondé na e durashon di e temporada haltu.

Tambe, asina ku bo risibí bo despensisashon, bo tin ku entrega bo karchi di shòfúr ousiliar.

E dispensashon aki:

• no ta ligá na un titular spesífiko di un pèrmit di taksi;

• no ta otorgá un derecho outomatiko pa un persona ku tin un pèrmit di taksi;

• ta permití solamente ku e persona envolví ta aktuá komo shòfúr den kuadro di un eksonerashon di taksi válido.

Un persona ku ta kai bou di un dispensashon ministerial:

• no por usa su dispensashon pa aktua komo shòfúr ousiliar pa otro persona ku tin un pèrmit di taksi;

• no por aktua simultáneamente komo shòfúr ousiliar pa un persona ku tin un pèrmit, i ku un dispensashon ministerial.

Despues di e periodo indiká den e desishon ministerial, e dispensashon ta kaduká outomatikamente. For di esaki no por derivá ningun derecho permanente ni ekspektativa legal.

E proseso di aplikashon pa un dispensashon temporal ta sigui e prosedura eksistente pa pèrmitnan sin desviashon. Tur petishonnan ta wòrdú someté na un evaluashon atministrativo i hurídiko.

Supervishon i kòntròl:

Durante e periodo di valides di e dispensashon, lo tin supervishon i kòntròl aktivo. Den kaso di violashon di e kondishonnan imponé, e minister por retirá e dispensashon atraves di un desishon ministerial.

Mas infomashon:

Pa mas pregunta, por akudí na whatsApp di Transporte Públiko via +599 9 527 8244, òf por manda un  mail na tp.uovv@gobiernu.cw.