Entrega di retiro di Minister Kimberly Lew-Jen-Tai i Minister Plenipotensiario Carlson Manuel

Korsou. 12 di yanuari 2026.

 

Topiko : Entrega di retiro di Minister Kimberly Lew-Jen-Tai i Minister Plenipotensiario Carlson Manuel

 

Pa medio di e komunikado aki direktiva di MFK {lesa Movementu Futuro Korsou} ta informa ku direktiva a bin ta atende kaso di dos miembro di nos organisashon ku ta aktualmente den funshon publiko ku ta senora Kimberly Lew-Jen-Tai i senor Carlson Manuel.

 

Awe ambos miembro lo entrega nan retiro i mesora direktiva lo kuminsa ku e proseso pa yena e dos posishonnan aki.

 

E kaso di senora Lew-Jen-Tai ta trata di un situashon den seno familiar i MFK lo no duna deklarashon publiko riba esaki mirando ku ta algu personal.

 

Pa loke ta trata senor Manuel. por a tuma nota di diferente akusashonnan riba medionan sosial i tambe di un moshon ku Parlamento kompletu a bai diakuerdo kune pa Kontrolaria General hasi un investigashon na “Kas di Korsou”.

 

Pa transparensia den e proseso di investigashon direktiva a pidi senor Manuel pa e entrega su retiro i duna espasio pa e investigashon tuma luga.

 

For di ana 2020. MFK a kambia e forma di maneha nos organisashon, kaminda transparensia, disiplina i respet mester ta sentral i nos a bin ta implementa e balornan aki di un forma rlgido.

 

Direktiva di MFK ta para pa trato igual i hustu, esei ta motibu ku direktiva ta tratando e situashonnan aki di forma serio i ku e diskreshon nesesario.

 

 

 

Gilmar Pisas

Lider politiko

 

Sithree van Heydoorn

Presidente