Señora Neysa Isenia nombrá komo Direktor-General (CEO) nobo di Integrated Utility Holding N.V. (Aqualectra)

WILLEMSTAD – Den reunion di Konseho di Minister di 14 di yanüari último, señora Neysa Isenia RA a wòrdu nombrá komo e Direktor-General (CEO) nobo di Integrated Utility Holding N.V. Señora Isenia ta un akountent di profeshon. Anteriormente señora Isenia a sirbi durante basta aña komo Direktor finansiero (Chief Financial Officer) di Aqualectra, e kompania ku ta enkargá ku suministro di koriente i awa aki na Kòrsou.
Durante último añanan, señora Isenia a kontribuí na un manera determinante na maneho di Aqualectra, partikularmente pa ku su stabilidat finansiero. Ku su nombramentu komo CEO, señora Isenia ta sigui duna liderazgo na e organisashon ku un konosementu amplio di e operashonnan di Aqualectra i e retonan ku e sektor di energia ta enfrentá. E nombramentu di señora Isenia konsekuentemente ta garantisá kontinuidat den e maneho di e kompania.

Komo akshonista di e kompania, Gobièrnu di Kòrsou ta deseá señora Isenia tur klase di éksito den ehekushon di su funshon nobo komo “CEO” di Integrated Utility Holding N.V.