30 di aprel 2026 selebrashon di dia di Rincon
30 di aprel 2026 selebrashon di dia di Rincon
Fundashon Herensia Kultural Rincon ke enfatisá ku e selebrashon di Dia di Rincon 2026, manera a kustumbrá, lo tuma luga riba 30 di aprel. A pesar di algun ahuste organisatorio, e esensia di e selebrashon kultural aki ta permanesé kompletamente intakto.
A tuma desishonnan organisatorio pa redusí e preshon riba e programa di 30 di aprel i pa hasi e selebrashon mas manehabel. Ademas, pa por garantisá e seguridat di tur partisipantenan, bishitantenan i boluntarionan.
Nos ta konsiente ku e kambio ku a anunsiá por a krea konfushon den komunidat. I pa esaki nos ta konsiderá importante pa komuniká kla i transparente tokante e plan di Dia di Rincon 2026.
Sin kita e diferente otro aktividatnan ku lo bai tin durante e luna kultural. Nos ta pone un tiki mas énfasis na e aktividatnan ku tin kambio.
E diferente paradanan a keda repartí di e forma aki:
• 28 di aprel 2026: Parada di skolnan
• 29 di aprel 2026: Parada di folklor ku e gruponan uniformá
• 30 di aprel 2026: Selebrashon ofisial di Dia di Rincon inkluso:
o Santu sakrifisio di misa
o Seremonia ofisial
o Presentashon di bandanan i gruponan krioyo riba 6 diferente esenario
o Parada di Antaño
o Simadan
o Parada di Unión
E tema di Dia di Rincon 2026 ta:
“Rincon, ankrá den union di famia”
Ku e tema aki, ke pone enfasis riba e importansia di famia komo e forsa di nos komunidat
Despues di e periodo di karnaval, Fundashon Herensia Kultural Rincon lo tene un konferensia di prensa pa duna mas detaye i informashon práktiko tokante e selebrashon di 2026.
Fundashon Herensia Kultural Rincon lo selebrá Dia di Rincon 2026 ku e famianan di Boneiru i tur bishitante den un forma digno, sigur i den union.

