Ta kita 49 opheto di propaganda butá sin pèrmit den área di Jan Thiel

Willemstad -Projectteam Toezicht en Handhaving (PTH) a kita 49 opheto di propaganda ilegal butá den área di Jan Thiel. Esaki a tuma lugá riba djamars 27 di yanuari 2026 .

PTH a kita bòrchinan di propaganda pegá riba propiedat di gobièrnu, palunan di lus di kaya, i na òf riba rotònde. Esakinan tabata butá na henter e karetera pa yega Playa Jan Thiel. Ponementu di opheto na mobilario públiko no ta pèrmití, pues no por pega nada na palunan di lus di kaya, den òf na un rotònde, bòrchi di tráfiko, ets.

Na tur, PTH a kita 49 bòrchi di propaganda for di riba henter e ruta menshoná. PTH ta hasi un apelashon na tur persona ku ta deseá na pone un opheto di propaganda, pa atendé e pèrmitnan nesesario via di ROP promé.