Thalina Gil ta bai representá Kòrsou na Teen Universe International 2026
Thalina Gil ta bai representá Kòrsou na Teen Universe International 2026
Willemstad- QMQ Organization ta orguyoso i entusiasmá pa biaha huntu ku Thalina Gil, pa representá Kòrsou riba un di e esenario mas grandi internashonal.
Thalina Gil, nos Miss Teenage Curaçao 2025, di 17 aña di edat lo representá nos dushi isla na e sertámen di mas grandi, Teen Universe International ku lo tuma lugá na Managua, Nicaragua di 23 di febrüari pa 2 di mart 2026.
E sertámen internashonal ta selebrá nan di 15 edishon i ta mustra di bira un selebrashon grandi. Komo parti di e selebrashon QMQ Organization ta orguyoso di por a invitá e CEO Alexander Montiel i e Teen Universe 2025 Guizza Maria Steenvoorde pa a konosé Kòrsou i mira di aserka e trabounan di nos organisashon i e konfia di Kòrsou den e sertámen grandi aki.
Teen Universe International ta konta ku 3 kategoria i nos Thalina Gil lo representá Kòrsou den e kategoria Teen. Lo tin un total di mas ku 60 partisipante di diferente pais huntu riba esenario.
Durante e siman lo tin un seña di bon bini kaminda nan lo risibí nan sach di pais ofisial. Durante e parti maintanan lo tin diferente paseo pa konosé Nicaragua i atardi lo tin ensayonan pa garantisá un show espektakular manera semper. E aña aki tur partisipante lo partisipá tambe na e Nicaragua Fashion Show. Esaki sigur ta un evento di hopi prestigio i lo ta un eksperensia úniko i inolvidabel.
E show preliminar lo tuma lugá dia 28 febrüari i e gran final lo tuma lugá 1 mart 2026 i por sigui e transmishonnan live via di Youtube di Teen Universe International.
Thalina ta den preparashon algun luna kaba pa asina por representá nos dignamente durante e siman importante. Pueblo di Kòrsou por sigui Thalina su páginanan sosial i tambe di QMQ Organization pa keda na altura di tur desaroyo i sostené nos representante.
Un danki ta bai na Ofisina di Tursimo di Kòrsou pa e sosten. Tambe un danki na Thalina Gil huntu ku su mayornan Renato i Viviana Gil Zabala pa tur nan konfiansa i sosten den nos organisashon pa hasi e soño aki un realidat i tambe na tur persona ku di un òf otro forma a yuda nos hasi e biahe aki posibel. Kòrsou, Thalina Gil ta kla pa hasié p’abo!
