Segun Promé Minister Pisas: “A bira posibel atrobe pa legalmente eksportá krudo Venezolano pa almasená òf prosesá na Kòrsou!”
Asuntunan General i Promé Minister
Segun Promé Minister Pisas: “A bira posibel atrobe pa legalmente eksportá krudo Venezolano pa almasená òf prosesá na Kòrsou!”
Publiká riba 09 Febrüari 2026
Willemstad – Gobièrnu di Kòrsou a tuma nota di e publikashon resien di Ministerio di Finansa di Merka tokante un lisensia nobo general ku ta permití sierto transakshonnan ku ta enserá petroli Venezolano bou di sierto kondishonnan. E desaroyo aki ta krea un kuadro legal nobo a base di kua almasenamentu, transbordo, i prosesamentu di krudo di orígen Venezolano ta bolbe bira legalmente posibel, basta ku e kompanianan ku ta hasi transakshon komersial di krudo ku Venezuela i PDVSA kumpli ku e kondishonnan stipulá dor di Gobièrnu Merikano.
E lisensia nobo (Lisensia General # 46 di OFAC) ta permití transakshonnan relashoná ku entre otro eksportashon, almasenamentu, transporte i refinamentu di krudo Venezolano, ora e aktividatnan aki ta wòrdu realisá pa kompanianan Merikano ku ta kualifiká i ku ta kumpli ku e kondishonnan. Pa Kòrsou esaki ta nifiká posibilidatnan nobo pa restourá uso di e infrastruktura i fasilidatnan petrolero eksistente na Bullenbaai i Emmastad, basta ku e kompanianan enbolbí kumpli ku e kondishonnan.
Na e momentonan aki, ya kaba Bullenbaai a yega su kapasidat di almasenahe di 6 mion bari di petroli. Entretantu Global Oil i 2BAYS a reanudá e negosiashonnan ku a wòrdu suspendé aña pasá pa reaktivá e “trein di asfalt” na Emmastad mas pronto ku ta posibel, mirando e último desaroyonan.
Promé Minister Pisas ta sumamente kontentu ku e desaroyo aki. Den e kuadro aki, Promé Minister Pisas a enfatisá: “Den e próksimo lunanan, via di e kompania estatal 2BAYS i CRU, Gobièrnu di Kòrsou lo sigui hasi su máksimo esfuerso pa akomodá petishonnan pa uso òf operashon di nos fasilidatnan petrolero, kumpliendo ku e eksigensianan legal huntu ku e operadónan i partnernan internashonal relevante.”
