Karnaval ta bou di bo kòntròl, ban hala mara, konstruyendo un Karnaval yená ku Harmonia, seif i sigur pa un i tur

Willemstad – Ministerio di Desaroyo Sosial, Labor i Bienestar (SOAW), sektor Famia i Hubentut, ta lansa un vidio edukativo i preventivo ku ta fokus riba e bienestar di mucha, hóben i adulto den nos komunidat. Ku e vidio aki, ministerio SOAW kier informá komunidat tokante e importansia di gosa seif. E meta di e vidio aki ta pa konsientisá riba nos responsabilidat komun y ta trata e tema kon bo por kuida bo mes i kuida otro durante e temporada di Karnaval.

Bienestar di e famia ta hopi importante. Pa e motibu aki Ministerio SOAW ta stimulá e komunidat pa kontribuí aktivamente na un ambiente seif, salú i sostenibel pa henter famia en partikular i pueblo di Kòrsou en general.

Pa Ministerio di Desaroyo Sosial, Labor i Bienestar y su sektor Famia i Hubentut, prevenshon ta e pilá importante den e área sosial. Usando mensahenan kla i aksesibel pa un i tur, sektor Famia i Hubentut ke hasi un yamada riba henter komunidat pa durante e temporada di Karnaval, tuma responsabilidat i kòntròl pa situashonnan ku por presentá. Ta importante pa tur hende ta hopi konsiente y alerta di situashonnan di riesgo ku por pone e seguridat i bienestar di e famia i su ambiente na peliger. Dor di aktua na un manera preventivo, responsabel y diligente nos por kontribuí huntu na un temporada di Karnaval respetuoso i festivo pa tur hende.

E vidio lo wòrdu transmití via diferente kanalnan di komunikashon manera: televishon, i plataformanan online, pa asina por alkansá un públiko amplio. Ku esaki ministerio SOAW ta reafirmá su kompromiso pa nos bienestar general, poniendo atenshon na nos retonan sosial na un manera preventivo i edukativo pa fortalesé e bienestar di gruponan di enfoke den nos komunidat. Ministerio SOAW ta hasi un yamada na henter komunidat pa kompartí e mensahe di e vidio i pa traha huntu na un sosiedat fuerte, solidario i resiliente.