KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

NOTISIA

Futuro di Reino Hulandes: Òutonomia komo base di koperashon.

Futuro di Reino Hulandes: Òutonomia komo base di koperashon.

Punto di bista di PAR riba e konseho di Raad van State riba 70 aña Statuut:

PAR ta di opinion ku Reino Hulandes ta di balor agragá pa pueblo di Kòrsou, sigur den e
realidat geo-politiko aktual. Forma parti di un konhunto mas grandi abase di koperashon
riba temanan komun i ku ta surpasá frontera di e islanan, kaminda tin repartishon di
responsabilidat riba temanan grandi i retonan nashonal i internashonal ta di balor pa e
futuro di nos pueblo. Di otro banda ta un echo ku Statuut TA un dokumento imperfekto, ku karakteristikanan kolonial i ku ta aksentuá e posishon dominante di Hulanda.
Kòrsou i e islanan den Reino Hulandes a demostra di ta kresiendo fuertemente.
Ekonomia ta kresiendo stabil despues di Covid i nos a alkansá logronan grandi riba nivel
deportivo. Esaki ta hasi nos mas resiliente i ménos dependiente finansieramente for di
Hulanda. Sinembargo manera tur isla chiki, nos tin retonan ku nos no por solushoná nos
so. Retonan manera seguridat nashonal, krimen ku ta krusa frontera i kambio
klimatológiko ta djis algun di nan. P’e motibu ei, rekonosé bo posibilidatnan, fortalesa i
limitashonnan i skohe pa koperá pa logra mas, no ta un señal di debilidat, sino unu di
madures.
Ta importante tambe pa nos para ketu na retonan nashonal (ku ta responsabilidat
òutonomo di e islanan) i ku solushon pa esakinan ta depende di e kapasidat humano,
finansiero i di konosementu limitá di e islanan. Retonan manera pobresa,
embehesimentu i un sistema edukashonal ku ta bòu di preshon i ku no ta brinda
oportunidat igual di desaroyo na esnan ku tin mas mester di dje.
Den e kuadro aki Frakshon di PAR ta duna su punto di bista riba algun liña di
pensamentu formulá dor di Raad van State den Su konseho di 12 okt 2024 riba 70 aña
Statuut:
1.Derechi di voto pa Parlamento Hulandes (Tweede Kamer). Frakshon di PAR no ta mira
balor demokratiko agregá di e posibilidat aki.
2. Uso di e Funshon di garantia/Waarborgfunktie den kuadro di derechonan humano.
PAR ta di akuerdo ku derechi internashonal ta obligá nos pa mira e funshon di garantia
mas den un lus di responsabilidat aktivo di sostené e islanan pa yega i mantené nan mes
na standardnan internashonal di derechi humano i di desaroyo. Den praktika esaki ta
nifiká mantena un nivel di bida aseptabel pa tur siudadano di Reino Hulandes.
Koperashon sinembargo, mester ta basá riba petishon di e islanan i pa evitá mal uso di e
funshon di garantia.
3. Koperashon estrecho ta eksigí un base di konfiansa nobo di ámbos banda di oseano.
Tur pais mester invertí den krea konfiansa.
4. PAR no ta pa definishon kontra di e instrumento Consensusrijkswet, paso tin okashon
ku un Rijkswet por ta nesesario. Sinembargo p’esei mester yega urgentemente na un
proseso kon ta yega na Consensusrijkswet.
5. Pa loke ta trata e diferensia di responsabilidat definí den Statuut, no ta nesesario yega
na un “tussenniveau”.

Statuut ta brinda sufisiente posibilidat pa kopera a base di
òutonomia i boluntat propio.
6. Pa loke ta trata uso di e Funshon di garantia pa garantisa bon gobernashon i seguridat
legal (rechtszekerheid), por referí na e komentario bòu di derechonan humano.
Apesar ku tin òutonomia, ya kaba institutonan estatal manera Griffie di Parlamento, Korte Komun, Raad van Advies, Kontráloria General i Ombudsman ta koperá estrechamente ku otro pa garantisa fluho di kapasidat i konosementu.
7. Por último PAR ta aksentuá ku mester fortifiká e posishon di GevMin i nombra hende
kapasitá. Pa logra esaki mester krea un profil. Mester fortifiká e organisashon tambe ku
personal kapasitá. Ta ku e meta aki, PAR a pidi un reunion públiko riba e tema di GevMin
i Kas di Kòrsou.
26 febrüari 2026
Quincy Girigorie
Lider di frakshon di PAR

 

 

639114718427035"
639114718427035"