Isaac Acosta a firma ku Texas Rangers na su 16 aña.

Isaac Acosta a firma ku Texas Rangers na su 16 aña.

E talento hoben ta logra un gran paso den su karera despues di brilla na torneo internashonal.

Béisbol lokal ta sigui produsi talento di haltu nivel. Isaac Acosta, un hoben di solamente 16 aña, a firma ofisialmente ku Texas Rangers, organisashon di Grandes Ligas, marcando asina un paso grandi den su karera deportivo.

Isaac a kuminsa hunga béisbol for di chikitiku na Marchena Braves, hungando den tur kategorianan di Vruminga, Minor, Junior i Senior.

Durante e añanan di formashon ey el a desaroyá su talento i a mustra su pasion pa deporte. Despues di kompleta tur e kategorianan lokal, el a drenta un akademia profeshonal pa sigui forma su mes na un nivel mas haltu.

Despues el a sigui su desaroyo den academia di CPL bou di guia di Yurendell de Caster, unda su talento a kuminsa bira mas notabel.

Durante su formashon, Isaac a partisipá den tur kategorianan: Little League, Intermedia, Junior League i Senior League. El a gana hopi experensia tantu na nivel lokal komo internashonal, biahando pa torneo na México i diferente estado na Estados Unidos manera Michigan i California.

Un di e momentonan mas spesial den su karera tabata ora na edad di 9 aña el a dal su promé grand slam na México, lagando tur base limpi i hiba Korsou na triunfo riba un veld di muchanan di 12 aña. E aktuashon ei a mustra for di tempran su karakter, su konfiansa i su gran potensial riba diamante.

Un momento desisivo den su karera a yega ora scout Mr. Chu for di Texas a mira su talento i a keda impresioná ku su aktua riba montikulo. Na luna di desèmber, Isaac a bai Santo Domingo unda el a domina komo lanzadó i a gana trofeo komo mihó pitcher di torneo.

Despues di e gran aktuashon, interes a bira serio i el a firma ku Texas Rangers. Na luna di yanüari el a integrá su mes den kampamento di Texas Rangers na República Dominicana, unda aktualmente el ta sigui su preparashon komo pelotero profesional.

Isaac a kuminsa su trayekto hunga komo outfield, despues promé base i tersera base. Pero bou di guiansa di Coach John i Coach Ender komo su coachnan di picheo, i bou di supervishon i bista profesional di Yurendell de Caster, kende a rekonosé su talento natural komo pitcher, Isaac a forma i desaroyá su mes den montikulo. For di e momento ey el a konsolida su mes komo lanzadó, posishon unda el awo ta mustra su mas grandi potensial i proyeksion pa futuro.

Ku solamente 16 aña, Isaac ta kuminsa un nobo kapitulu den su bida deportivo, ku meta kla pa sigui krese i logra su sueñonan den béisbol profesional.