“Omar Gill, eks miembrodi partido Mihó Kòrsou, lo no baha su nivel ni lo no partisipá den tiramentu di lodo”.
Willemstad – Omar Gill, eks miembro di partido Mihó Kòrsou, lo no baha su nivel ni lo no partisipá den tiramentu di lodo.
Primeramente mi ke ekspresá mi desapunto pe atakenan personal kousá pa un publikashon den korant i riba un página di Facebook sin verifiká ku mi persona ku loke a wòrdu publiká ta realmente korekto.
Ta importante pa mi klarifiká ku ami a wòrdu yama siman pasa dor di un reportero di un korant di atardi, puntrando mi opinion tokante e aña di gobernashon tras di lomba, relashonando esaki ke partido ku kual mi a partisipá na elekshon na mart 2025.
Den tur transparensia mi a indiká klaramente na e reportero ku mi no ta miembro mas dje partido i p’esei mi no por papia na nòmber di e partido. Esaki ta un prinsipio básiko di étika. Fuera di esaki, mi no a hasi ningun otro komentario ni a duna mi opinion tokante dje integrantenan i desaroyo final dje partido. Mi no ta responsabel pa e interpretashon òf konklushonnan ku e reportero a skohe pa publiká.
Ta konosí ke lider dje partido a tuma su retiro di inmediato despues dje derota na Mart 2025. Integrantenan ku tambe tabata riba e lista por konfirmá esaki i tambe ku un grupo chikí, inkluso e direktiva interino, na e momento ei a intentá mantené e partido na bida despues ku e lider a baha bai. Lamentablemente e intenshon pa kontinuá no a kristalisá pa motibunan aheno i asina e partido a kaba di eksistí. E silensio ku a reina te ku e siman aki ta prueba palpabel di esaki.
Alabes ta importante pa enfatisá ku mi no a papia ku niun otro medio di komunikashon, ni korant, ni tv, ni radio, ni influencers, ni medio sosial. Seguramente tampoko mi no a papia ku e página di Facebook ku a publiká informashon i potrèt di mi persona sin nunka tuma kontakto ku mi. P’esei riba e página di Facebook konserní aki i tur hende por mira ku mi a refutá kontenido dje artíkulo ku nan a fantasia i publiká.
Ta konosí ku awendia riba media sosial e strategia di desinformashon ta wòrdu usa pa atraé bishita, hala atenshon òf bati un persona. Evidente ta ku prinsipio básiko di periodismo di “hoor i wederhoor” sigur no a wòrdu apliká, ni respetá.
Polítika ta un kompetensia kaminda tin ganadó i pèrdèdó. Den e elekshon pasa e partido a pèrdè i posteriormente a stòp di funshoná. Ami no ta un mal pèrdèdó i no a keda ku ningun renkor kontra pueblo ni tampoko ningun dje integrantenan. Meskos ke temporada ku mi a fungi komo sekretario
dje partido, mi portanan a keda i lo sigui habrí pa diálogo, kombersashon i kolaborashon pa sigui riba kosnan positivo pe pueblo di Kòrsou.
Mi no lo gasta mas energia riba e asuntu aki i seguramente mi lo no drenta den ningun diskushon òf tiramentu di lodo.
Masha danki.
Omar Gill
