INSKRIPSHON PA E KANTADO MAYO A TUMA LUGA DJADUMINGO 8 MART 2026

March 9, 2026 REDAKSHON

62 komposishon pa É Kantadó Mayó.

Kórsou, 8 mart 2026

Djadumingu 8 mart tabatin klousura di inskripshon pa e festival É Kantadó Mayó ku lo bai tuma lugá dianan 17,18,19 i 21 di mart próksimo.

Tabata un ambiente masha ameno un biaha mas na edifisio di Ultimate Automobiles (Kaya Tula 44 Ser’i Dòmi) ku a habri nan porta nan i ta e “kas” di tur loke ta akontesé e temporada di seú 2026.

62 komposishon a inskribí pa partisipá na e festival di É Kantadó Mayó ku e aña aki un biaha mas ta na enkargo di Richie Rich Pieter i su tim di Boldstarsz.

Kada agrupashon musikal a presentá na Ultimate Automobiles situá na Ser’i Dòmi den nan estilo úniko ku nan propio ambiente pa inskribí nan mes.

E festival ta bai tuma lugá na Kunuku di Shon Mi, un lokalidat ku a ser kreá spesial pa e aktividat nan di e temporada di seú aki kaminda nos lo sinti nos realmente den e ambiente di un kunuku.

Ya karchi nan ta na disponibel na ticketpoint na saliña, 24 uur uit de muur, ESO i Mensing Caminada pa xcg. 60,- pa e pakete di e 4 anochi nan. Fundashon Jag ta gradisí kada un di e partisipantenan ku lo ta den kontienda e aña aki.

Alabes ta invitá henter pueblo di Kòrsou pa asisti masalmente na tur nan aktividat nan asina sostene nos kultura.