Na ser’i  Dòmi ta bai tin fiesta !!!!

Na ser’i  Dòmi ta bai tin fiesta !!!!

Kòrsou, 7 mart 2026.

Fundashon Jag ta den ful preparashon pa nan aktividat nan ku ta bai start den wikènt benidero ku elekshon di reina seú i rei tapushi i e siman siguiente e anochi nan di Kantadó Mayó i despues Bos di Kunuku.

Fundashon Jag ta hopi gradesido di por tin sosten total di Ultimate Automobiles ku ta agensia di e prestigioso auto marka CHERY komo nan spònser.

E spònser aki a habri su porta nan pa e organisashon por hasi uzo di su lokalidat pa por tene nan enkuentro nan i mas bunita ainda a pone nan tereno disponibel pa krea un “kunuku” ku e organisashon a duna nòmber di un habitante den e kaso aki ” Kunuku di Shon Mi”.

Djasabra dia 7 di mart Fundashon Jag a reuní ku habitantenan di Seru Dòmi i a plantia nan idea pa ku e aktividat nan ku e  organisashon lo ke hasi den e bario i ofisialmente despues di a pidi e habitante nan pèrmit uninamamente  e habitante nan a duna Fundashon Jag  bendishon  pa hasi tur aktividat den nan bario.

Despues a delibera ku e bario kon lo bai traha huntu pa asina garantisá ku tur kos lo kana bon durante aktividat nan.

E intenshon huntu ku e bario ta pa den e dia nan ku tin e aktividat nan den bario henter bario ta enbolbí i lo habri nan porta nan pa pueblo di Kòrsou kaminda for di den dia habitante nan ta bai bende kuminda i kos nan di boka dushi i tambe lo duna nan kompleto koperashon i sosten na e aktividat nan ku lo tuma luga den bario di Ser’i Dòmi.

Djamars dia 10 di mart pa 5 or di atardi lo bai tin apertura ofisial di ” Kunuku di Shon Mi” (Kaya Tula 44) na Ultimate Automobile ( Crown Automotives) kaminda pueblo di Kòrsou ta keda invitá pa bin sera konosi ku e lokalidat nobo aki kaminda aktividat nan di seú lo bai tuma lugá proksimamente.