Partisipashon relashoná ku Kampionato Mundial di Futbòl 2026

Reakshon di Minister enkargá ku enseñansa relashoná ku dianan liber enkonekshon ku partisipashon di selekshon di Kòrsou na Kampionato Mundial di Futbòl 2026

WILLEMSTAD – Minister di Enseñansa, Siensia, Kultura i Deporte (ESKD), sr. Sithree van Heydoorn, a tuma nota di mensahenan den korant i riba medionan sosial tokante di posibel káos ku ta keda kreá den skolnan, en konekshon ku e tema di Kampionato Mundial di Futbòl 2026. Minister ta duna klaridat riba e tópiko akí pa asina evitá ku innesesariamente pániko ta keda kreá den nos komunidat.

Partisipashon di nos selekshon di futbòl den e Kampionato Mundial di Futbòl 2026, ta un momentu spesial, históriko i importante pa pueblo di Kòrsou. Minister ta komprondé i ta kompartí e entusiasmo ku esaki ta kousa bou di pueblo di Kòrsou i ku esaki tin su reperkushon tambe riba studiante, mayornan, dosente i personal no-dosente. Na mes momentu, luna di yüni ta un momentu krítiko den e aña eskolar kaminda tin prueba final (èksamen), finalisashon di programanan di enseñansa i preparashon pa e aña eskolar nobo. Minister ta enfatisá ku kontinuidat di enseñansa ta keda prioridat nashonal.

Minister ta informá ku riba 3 di febrüari último, Minister i ministerio di ESKD, a tene un reunion ku tur direktiva di skol pa kompartí e punto di bista di ministerio di ESKD i pa haña informashon di e situashon ku ta reina den skolnan. Ministerio di ESKD ta tene kuenta ku entre otro e periodo di èksamen i kontinuidat di enseñansa i pa e motibu akí ministerio no ta duna liber di skol den forma general. Ta bon pa enfatisá ku tin hopi mas studiante i dosente ku no ta partisipá na Mundial kompará ku e petishonnan ku ya tin registrá. Kualke desishon mester ta di tal forma ku interes general ta keda sirbí. Desishon pa sera skol den konekshon ku Mundial ta nifiká stòp enseñansa pa dos siman. Un desishon asina no ta responsabel ni hustu pa tur otro ku no ta partisipá na e evento Mundial di Futbòl.

Ademas, no por tuma un desishon isolá for di otro sektornan di nos komunidat, ku tambe por tin e deseo di partisipá na Mundial. E opshon pa sera skol i habri aña eskolar nobo dos siman promé tampoko ta un desishon responsabel. Tumando un desishon asina, tin dos efekto negativo. E promé ta ku ta kita dos siman di preparashon pa èksamen for di e studiante i di dos, esaki tin efekto konfliktivo ku fakansinan planiá den ougùstùs.

Basá riba e puntonan ariba menshoná direktivanan di skol a bai di akuerdo ku e posishon di ministerio di ESKD pa no sera skol. A deliberá tambe riba e maneho di direktivanan pa evaluashon di petishonnan i otorgamentu di dispensashon ku ta kai bou di responsabilidat di direktivanan di skol mes. Palabrashon ta ku mes kriterio di evaluashon ta ser uzá, manera prueba di entrada di e weganan di Mundial i pasashi. Minister a pidi tur direktiva di skol pa evaluá e petishonnan ku atenshon i komuniká mas lihé posibel na mayornan, dosente i personal no-dosente. E evaluashon mester sosodé di un forma transparente i konsistente, buskando un balansa entre kontinuidat di enseñansa i e momentu tan spesial i históriko.  Finalmente Minister ta añadí, ku kada mayor ta responsabel pa pone enseñansa di nan propio yu na promé lugá.

Partisipashon na Mundial ta algu úniko, pero esaki no mester perhudiká resultado di skol di nos yunan. Kumpra pasashi i entrada pa weganan di Mundial sin aprobashon di skol òf doño di trabou ta un riesgo ku kada persona mester tuma konsientemente pa nan mes. Minister ta konfia ku direktivanan di skol ta atendé e petishonnan di forma profeshonal, asumiendo nan responsabilidat. Ministerio di ESKD t’ei pa sirbi i yuda ku konseho kaminda tin mester.

Liderazgo no ta nifiká bisa “si” riba tur kos. Liderazgo ta tambe e kurashi pa bisa “nò” ora esaki ta nesesario. Minister enkargá ku enseñansa sr. Sithree van Heydoorn ta hasi un apelashon na pueblo kompleto pa ban sirbi interes general ku e diligensia nesesario i ta konta ku koperashon di tur partido relevante den esaki.

—

Sr. Sithree van Heydoorn

Minister di Enseñansa, Siensia, Kultura i Deporte