A limpia i kita lima for di e rampa na Playa Pier di Marie Pampoen

A limpia i kita lima for di e rampa na Playa Pier di Marie Pampoen

Willemstad – Djabièrnè 13 di mart 2026 via di medionan sosial Gobièrnu a tuma nota di un situashon di atenshon na Playa Pier di Marie Pampoen. Na e playa públiko aki tin un asina yamá “rampa” kaminda personanan ku tin problema ku mobilidat i personanan desabilitá por baha na laman.

E motibu ta ku lima a bini ta krese riba e superfisie di e rampa i hasi esaki sumamente lisu kual ta forma un riesgo ku personanan por slep riba e rampa. 

Curaçao Tourist Board (CTB) ta e instansia ku ta manehá e playa aki i nan a aserká Ministerio di GMN pa por duna asistensia pa resolvé e problema aki. Djasabra 14 di mart empleadonan di Ministerio di GMN a raspa e rampa pa asina eliminá e lima. 

Playa Pier di Marie Pampoen ta un di e poko playanan públiko di Kòrsou ku tin e tipo di rampa aki. Gobièrnu ta rekonosé ku tin gran nesesidat di rampa na nos playanan públiko komo fasilidat pa personanan ku desabilidat òf ku tin difikultat ku mobilidat. Tin plan pa pone rampa i/ òf fasilidatnan na otro playanan públiko tambe di manera ku grandinan òf personanan ku problema ku mobilidat por baha na laman di forma safe i sigur.          

Riba potrèt por mira e rampa na Playa Pier di Marie Pampoen. Tambe por mira un empleado di Ministerio di GMN limpiando e rampa.