Minister Middelhof ta konkretisá promé logro di Programa di Gobernashon ku organisashon di e Curaçao Trade Strategy Forum 2026

WILLEMSTAD – Minister di Desaroyo Ekonómiko, Dr. Roderick Middelhof, ayera mainta a habri ofisialmente e Curaçao Trade Strategy Forum 2026, markando un paso importante den e implementashon di e programa di gobernashon i den e strategia pa fortalesé i diversifiká ekonomia di Kòrsou.

Ku apertura di e foro aki, Minister Middelhof ta realisá e promé resultado konkreto di e programa di gobernashon. Manera Minister Middelhof a primintí anteriormente, e no a bini pa biaha so, sino pa konkretisá logronan pa Kòrsou!

E foro ta reuní representantenan di gobièrnu, sektor privá, akadémikonan i organisashonnan internashonal pa diskutí e posishon ekonómiko di Kòrsou den mundu i pa determiná e siguiente pasonan den e desaroyo di e Strategia Nashonal di Eksportashon (National Export Strategy – NES). Segun Minister Middelhof, e trayekto pa fortalesé e kapasidat di eksportashon di Kòrsou a kuminsá ya 8 aña pasá den kolaborashon ku e International Trade Centre, un partner internashonal ku a sigui sostené e pais den e proseso di desaroyo di su strategia di eksportashon.

Den su diskurso di apertura, Minister Middelhof a indiká ku e mundu di komèrsio global ta kambia rápidamente debí na faktornan manera geopolítika, transformashon digital i preshon klimátiko. Den un konteksto asina, paisnan chikí manera Kòrsou mester ta fleksibel, inovativo i bon konektá ku merkadonan internashonal.

Den e último lunanan, Kòrsou a intensifiká su relashonnan ekonómiko den region. Un ehèmpel importante di esaki ta e restablesementu resiente di diálogo gubernamental entre Kòrsou i Panama, despues di mas ku dieskuater aña sin kontakto formal. Segun Minister Middelhof, esaki ta mustra e kompromiso pa fortalesé koperashon regional i pa krea un brùg ekonómiko mas fuerte.

Minister Middelhof a referí tambe na e desaroyonan positivo den ekonomia lokal. Sektor di ‘manufacturing’, por ehèmpel, a mustra un kresementu real di 9.6% den di dos kuartal di 2025, indikando e potensial pa amplia e base ekonómiko di Kòrsou mas aleu ku turismo.

Durante su diskurso, Minister Middelhof a pone enfoke tambe riba e manera ku Kòrsou ta ganando mas visibilidat internashonal. Resientemente, e legendario beisbòlista di Kòrsou, Andruw Jones, a wòrdu nombrá komo Embahador di Turismo di Deporte di Kòrsou, miéntras ku e selekshon nashonal di futbòl a logra kualifiká pa FIFA World Cup 2026.

Den e tres dianan di e foro, partisipantenan lo analisá e posishon ekonómiko di Kòrsou, identifiká oportunidatnan nobo pa eksportashon i koperashon internashonal i formulá prioridatnan pa desaroyá un ekonomia mas diversifiká, resiliente i kompetitivo. E diskushonnan i rekomendashonnan ku lo sali for di e foro lo wòrdu dokumentá den un informe stratégiko ku lo sirbi komo kompas pa e siguiente fasenan di implementashon di e ‘National Export Strategy’ te na 2030.

Segun Minister Middelhof, e foro ta mustra ku Kòrsou ta dispuesto pa pensa grandi tokante su futuro: “Nos ta un isla chikí, pero nos ta un isla stratégiko. Si nos ta fleksibel, inovativo i bon konektá ku mundu, nos por kombertí e kambio global den oportunidat pa nos pueblo i nos ekonomia.”

Ku apertura di e Curaçao Trade Strategy Forum 2026, e gobernashon aktual ta pone un base pa un ekonomia mas fuerte, mas resiliente i mas diversifiká pa Kòrsou.