Publikashon di informashon di pèrmit di konstrukshon

Willemstad – Servisio pa Planifikashon Urbano (ROP) ta publiká informashon di pèrmitnan di konstrukshon otorgá. Pa medio di e publikashonnan aki, ta mantené komunidat informá di lokual ta tuma lugá den nan besindario pa loke ta planifikashon urbano.

Tur siman ta publiká informashon di e siman anterior. Por bishitá e website http://www.vvrp.cw/permit pa por tuma nota di informashon di e promé 11 simannan di 2026. Den siman 11 di 2026, ROP a otorgá 15 pèrmit di konstrukshon. Riba e website, tin tambe un archivo di añanan anterior.

E propósito di un pèrmit di konstrukshon (‘bouwvergunning’) ta pa sigurá ku konstrukshon ta sosodé di forma sigur, legal i segun regla. E pèrmit ta importante entre otro pa:

• Seguridat – kontrolá si e edifisio ta fuerte i sigur (pa habitantenan i su besindario)

• Reglanan i planifikashon di e área – wak si e konstrukshon ta na un lugá kaminda ta pèrmití i segun e medidanan korekto

• Protehá e besindario – tene kuenta ku bisiñanan, tráfiko, naturalesa i infrastruktura

• Garantisá kalidat – sigurá ku e konstrukshon ta kumpli ku normanan tékniko i di konstrukshon

Un pèrmit di konstrukshon ta básikamente un aprobashon ofisial di gobièrnu promé ku bo por kuminsá konstrukshon òf renovashon.