Promé Minister Pisas ta risibí Direktor-General di Relashonnan di Reino pa fortalesé kolaborashon den Reino

WILLEMSTAD – Riba djaluna, 16 di mart 2026 Promé Minister sr. Gilmar a risibí bishita di sra. Barbera Wolfensberger, Direktor-General pa Relashonnan di Reino na e Ministerio di Interior i Relashonnan di Reino. Sra. Wolfensberger a wòrdu kompañá dor di sr. Gerbert Kunst, Representate di Hulanda na Aruba, Kòrsou i St. Maarten.

Esaki tabata un bishita di kortesia kaminda sra. Wolfensberger a bini pa introdusí su mes komo e Direcktor-General nobo di Relashonnan di Reino.

Durante e enkuentro, Promé Minister Pisas i sra. Wolfensberger a interkambiá riba e prioridatnan pa Gabinete Pisas III manera redukshon di pobresa i edukashon i kon Gabinete Jetten por kolaborá pa e desaroyo sostenibel di Kòrsou.

Promé Minister Pisas i sra. Wolfensberger a reafirmá nan deseo pa intensifiká kolaborashon den Reino i pa sigui mantené un diálogo kontinuo na benefisio di Kòrsou.