CBCS ta gana premio Central Banking Currency Manager Award 2026 

  

WILLEMSTAD/PHILIPSBURG — Centrale Bank van Curaçao en Sint Maarten (CBCS) a keda nombrá  e aña akí komo ganadó di e prestigioso premio Currency Manager Award 2026 di e organisashon  Central Banking. E premio akí ta forma parti di un konkurso anual, Central Banking Awards, ku ta  duna rekonosementu na e logronan importante di e bankonan sentral di rònt mundu. CBCS ta  risibí e distinshon akí komo rekonosementu pa e introdukshon eksitoso di florin karibense den  2025.  

‘Introdukshon di florin karibense tabata un di e proyektonan di mas importante di CBCS den e  último añanan. E rekonosementu internashonal akí ta un gran onor pa nos komo organisashon. E  premio akí ta mustra kiko por ser lográ ora bo tin un tim profeshonal i motivá, ku ta kolaborá  estrechamente ku partner i konsehero konfiabel,’ asina Richard Doornbosch, Presidente di CBCS,  a deklará. 

Central Banking Awards ta keda otorgá pa un hurado independiente ku ta konsistí di vários  miembro di e tim editorial i e komité di konseho editorial di e organisashon Central Banking. Nan  ta basa nan desishonnan riba análisis, evaluashon i informe. E hurado a komentá ku e trayekto akí  a mustra kon un banko sentral chikitu tambe por realisá proyekto kompleho eksitosamente, danki  na un strategia bon pensá, un implementashon stabil i bon kolaborashon ku su partnernan  eksperto. 

Christopher Jeffery, presidente di e komishon di Central Banking Awards, a splika desishon di e  hurado: ‘Ku komunikashon kla na vários idioma, un diseño balansá, inspirá riba e islanan i  teknologia moderno riba tereno di siguridat, CBCS a logra transformá skeptisismo den  partisipashon i kompromiso. Di e manera ei, nan a kontribuí na mas konfiansa di públiko i a fortifiká  nan soberania monetario.’ 

E aña akí ta e di 13 biaha ku e premio Central Banking Awards ta keda otorgá. E premio ta basá riba  mas ku tres dékada di análisis independiente i profundo di e desaroyonan ku ta tuma lugá serka e  bankonan sentral di rònt mundu. 

Willemstad, 19 di mart 2026 

CENTRALE BANK VAN CURACAO EN SINT MAARTEN 

Central Banking ta operá Central Banking Institute, ku ta un grupo di banko sentral afiliá.  Central Banking Institute ta e fuente di informashon prinsipal pa su sektor. E ta brinda  informashon amplio, kapasidat di benchmarking sin igual, apoyo renombrá pa desaroyo  profeshonal i oportunidat pa krea kontakto na tur parti di mundu.