Minister Hato di Gobernashon, Planifikashon i Servisio Públiko ta bishitá tur servisionan i organisashonnan di ministerio
Maneho di Gobernashon, Planifikashon i Servisio Públiko
Minister Hato di Gobernashon, Planifikashon i Servisio Públiko ta bishitá tur servisionan i organisashonnan di ministerio
Publiká riba 27 Mart 2026
Willemstad – Resientemente, Minister Hato di Gobernashon, Planifikashon i Servisio Públiko a hasi un serie di bishitanan di trabou na tur servisionan i organisashonnan ku ta kai bou di e ministerio. Durante e bishitanan aki, e minister a haña e oportunidat pa wòrdu informá ampliamente tokante e trabounan di kada dia, proyektonan na kaminda i e progreso den desaroyo di maneho.
Hefenan di departamento i empleadonan a presentá ku orguyo riba kiko nan ta trahando na dje aktualmente. Den e presentashonnan, nan a trata, entre otro, aktualisashonnan importante den formulashon di maneho, manera tambe e desaroyonan i mehorashonnan kontinuo den e aparato gubernamental. Ademas, na CBS e minister a haña un bista mas kla tokante e manera ku datonan estadístiko ta wòrdu rekohé, analisá i usá pa sostené maneho.
Tambe a papia abiertamente riba e desafionan ku e organisashon ta enfrentá, manera mudansanan temporal i adaptashonnan operashonal, i kon ta atendé nan di forma efektivo.
Un aspekto spesial di e bishitanan di trabou tabata ku e minister mes a partisipá aktivamente den diferente proseso di servisio. Asina, e minister a generá personalmente un ekstrakto na e lokèt di komunidat i a hasi investigashon di stambòm na Archivo Nashonal. E eksperensia praktiko aki a duna bista balioso den e efisiensia i orientashon na kliente di e servisio.
E bishitanan ta subrayá e dedikashon i profesionalismo di empleadonan den e ministerio. A pesar di e desafionan menshoná, e ministerio ta sigui komprometí pa brindá servisio di kalidat, aksesibel i konfiabel na komunidat.
Ministerio di Gobernashon, Planifikashon i Servisio Públiko ta sigui enfoká riba mehorashon i inovashon kontinuo, ku meta di sirbi e siudadano na e mihó manera posibel.
Ministerio di Gobernashon, Planifikashon i Servisio Públiko ta ekspresá su agradisimentu na e minister pa su tempu, kompromiso i interes ku el a mustra durante e bishitanan di trabou aki.
